Нийслэлийн Хан-Уул дүүргийн 12 дугаар хороонд  долоон хүүхэд барьцаалсан хэрэг өчигдөр орой гарсан байна. Хэрэг  Био комбинат буюу Хан-Уул дүүргийн 12-р хороонд гарсан бөгөөд барьцаанд байсан  хүүхдүүдийг  суллаж,  барьцаалагч эгтгээдийг  баривчилсан талаар дөнгөж сая ЦЕГ-аас мэдээллээ.

Юутай ч хэрэг явдлын талаар ЦЕГ-ын  хэвлэл мэдээллийн төвийн дарга, цагдаагийн хурандаа Б.Баатархүүгээс тодруулахад "Ийм хэрэг  гарсан нь үнэн. Хан-Уул дүүргийн 12 дугаар хороонд Биокомпанитад согтуу иргэд бужигналдаж, дуу шуугиан гаргаад байна гэсэн дуудлагаар "Эрхэс" 102 чиглэлийн хөдөлгөөнт эргүүлийн ахлах дэслэгч  Н.Дашцэрэнгээр ахлуулсан баг хэргийн газар дээр очсон.  Улмаар тэднийг очиход Мод үржүүлэхийн газар ажилладаг нэг иргэн хүүхдүүдэд хутга тулгаж барьцаалсан байдалтай байсан. Тиймээс барьцаалагч этгээдтэй ярилцаж тохирч, шуурхай байдлаар хэлэлцээр хийж барьцаалагсдыг сулласан байгаа юм. Ингэж  таслан зогсоогоод хэргийн газар үзлэг хийхэд тухайн газар нэг иргэн амь насаар хохирсон, бас нэг хүн зодуулсан байдалтай байсан. Улмаар  шархадсан иргэнд эмнэлгийн анхан шатны тусламж үзүүлээд, мөрдөн байцаалтын ажиллагаа явуулж байна. Барьцаалагч этгээдийг цагдан хорих төвд саатуулсан" гэв.