Хан-Уул дүүргийн 12 дугаар хороонд өдгөө 25 настай, Дорнод аймгийн харьяат М гэгч нь долоон оюутанг барьцаалж, нэг иргэний амийг хөнөөсөн ноцтой хэрэг гарсан талаар бид шуурхай хүргэсэн.

Тэгвэл уг хэргийн мөрөөр манай сурвалжлах баг Хан-Уул дүүргийн Биокомбинатыг зорьсон юм. Хотын төвөөс нэлээд зайдуу гэж хэлж болох энэ газарт ийм төрлийн хэрэг урд өмнө нь бараг л гарч байгаагүй болохоор хүн барьцаалсан этгээдийн талаар чихтэй болгон нь сонссон байхаас яахав. Тиймдээ ч бидний хэсэг нөхөд хэрэг гарсан газрыг тэндэхийн оршин суугчдаас асууж төвөггүйхэн олоод очсон юм.

Биднийг уг газарт  очиход оюутнууд болоод ажилчдын байрлаж байсан нэг давхар дүнзэн байшин цоожтой, нэлгэр том хашаа нэг л эл хул болсон байдалтай байв. Мөн Мод үржүүлэх төв гэсэндээ хашаандаа цэцэг, модны том том хүлэмжүүдтэй, байшингийнх нь гадна банз, шургаалга хураалттай харагдав. Ийн ойр орчмыг ажиглаж зогстол  хажууханд нь байрлах манаач М.Алтангэрэл гарч ирж, бидэнтэй цөөн хором ярилцсан юм. Тэрбээр цагдаа нарт хамгийн анх дуудлагыг өгсөн хийгээд цагдаа нарыг хэрэгтэнтэй ярилцах замаар хэлэлцээр хийж байхад хажууд нь байлцсан гэрч юм.

Манаач М.Алтангэрэл: Надад хүмүүс хоорондоо зодолдож байгааг дарга утасдаж хэлсэн

Намайг унтаж байтал үүрээр 04.40 минутын үед буюу бараг л 05.00 цаг болж байхад дарга над руу утасдаад “Алтангэрэлээ наана чинь янз бүрийн зодоон нүдээн болоод байгаа юм биш үү. Чи гараад нэг хараатхаач” гэсэн. Ингээд гараад очтол байшин  дотор байсан хэдэн хүүхэд унтаж байгаа бололтой өрөө нь харанхуй, гэрэл нь асаалтгүй байсан. Улмаар баруун талынх нь цонхоор харсан чинь нэг хүн цус нөжтэйгээ холилдчихсон хэвтэж байсан. Ингэж би юу болоод байгааг мэдсэн.

 Гайхаад юун хүн цус, нөжтэйгээ холилдчихсон хэвтэж байна вэ гээд гайхаад ажиглатал манай гурван ажилчины нэг нь байсан. Тиймээс би гэртээ гүйж орон, эхнэрийнхээ утсаар дарга руу утасдаж хэлснийхээ дараа, 102 руу утасдаж дуудлага өгсөн. Удаа ч үгүй цагдаа нар ирж намайг машиндаа суулгаад тэр байшингийн гадаа цонхны доор очоод зогссон.   Ингээд цонх, хаалгыг нь нүдээд хаалгаа ер онгойлгож өгөөгүй. Гэтэл нөгөө цонхоор нь очоод хартал нэг залуу нэг оюутан залуугийн хоолойн дээр хутга тулгачихсан зогсож байсан. Улмаар цагдаа нар нэмэлт хүч дуудсан. Төд удалгүй олон цагдаа нар ирээд цонхны наана цаанаас ярьж аргалсаар байж, хутгыг нь тавиулаад баривчлаад аваад явсан. Ийм л зүйл болсон.

Тухайн газрын хажууханд байрлах өөр нэгэн иргэнээс хэргийн талаар тодруулахад  "“Цэцэрлэгжилт” гэх компанийн гурван ажилчин нийлж архи уусан юм шиг байгаа юм. Тэгээд хоорондооо муудалцаад л сүүлдээ ийм хэрэг болсон шиг байна. Юунаас болж муудалцсаныг бүү мэд. Ямарч байсан гурван ажилтны нэг нь өнгөрч, нэг нь бэртсэн. Хоёр өрөө байшингийн нэг өрөөнд нь гурван ажилтан, нөгөө өрөөнд оюутнууд байрладаг байсан гэсэн. Оюутнуудыг хараад байхад байнгын энэ байшиндаа байрлаж ажилладаг юм шиг байсан.

    Ийн манай сурвалжлах баг хоёр иргэнээс яриа аваад биокомбинатаас буцсан юм.

 Улмаар ЦЕГ-ыг зорьж, хэвлэл мэдээллийн төвийн дарга, цагдаагийн хурандаа Б.Баатархүүгээс хэрэг явдлын талаар асууж тодрууллаа.

-Хэрэг явдлын талаар дэлгэрэнгүй мэдээлэл өгөхгүй юу?
-Уржигдар шөнө үүрээр 04.15 минутад Хан-Уул дүүргийн 12 дугаар хороонд байрлах Мод үржүүлэхийн газар согтуу хүмүүс зодолдоод байна гэсэн мэдээлэл цагдаагийн байгууллагад ирсэн. Дуудлагын дагуу Хан-Уул дүүрэг дэх цагдаагийн хоёрдугаар хэлтсийн "Эрхэс" 112 чиглэлд үүрэг гүйцэтгэж байсан цагдаагийн ахлах дэслэгч Н.Цэрэн, Чулуун-Эрдэнэ нар тус газарт шуурхай очсон. Очиход тухайн байшин дотроосоо цоожтой, нэг хүн хутга тулган хүмүүсийг айлган сүрдүүлж барьцаандаа байлгасан байсан. Дуудлага мэдээллээр очсон цагдаагийн алба хаагчид тухайн иргэнтэй ярилцлага зохион байгуулж мэргэжлийн ур чадвар гаргаж ажилласан. Үүний үр дүнд 06.00 цаг гэхэд барьцаалсан этгээдийг суллаж тус гэмт хэрэг үйлдсэн этгээдийг баривчилсан.

-Барьцаанд яг хэчнээн хүн байсан бэ?
-Барьцаанд нийтдээ 10 хүн байгаагаас 3 нь насанд хүрсэн, долоо нь насанд хүрээгүй мэргэжил сургалтын төвийн оюутнууд байсан.  Улмаар хэргийн газар үзлэг хийхэд  нэг хүн амь нас хохирсон, нэг хүн бэртэж гэмтсэн байдалтай байсан. Бэртсэн хүнд яаралтай эмнэлгийн анхан шатны тусламж үзүүлж, эмнэлгийн байгууллагад хүргэсэн.

-Маргаан яг юунаас болсон талаар мэдүүлэг өгч байгаа юу?
-Маргаан юунаас болсон гэх зэрэг бусад зүйлсийн мөрдөн байцаалт явагдаж байна. Тухайн үед зодоон болж нэг хүн бэртэж гэмтсэн. Ажилчид нь архи уусан байсан. Согтуурлын зэрэг бусад зүйл ч шинжилгээгээр гарна.

-Тухайн мод үржүүлгийн ажилчдын байр яг ямар компанийн байр вэ?
-"Цэцэрлэгжилт" компанийн мод үржүүлгийн газар. Энэ дээр тухайн полтехникийн нэг, хоёрдугаар курсын оюутнууд гэрээгээр дадлага хийж байсан.
Нэмэлт мэдээлэл болгож хэдэн баримтуудыг бусад эх сурвалжаас цуглуулж байх явцад бэртсэн болон амиа алдсан хоёр ажилчныг халуун тогоогоор удаа дараа цохиж, биед нь гэмтэл учруулсан талаарх баримт олдлоо. Нас барсан иргэнийг Жамьяансүрэн гэдэг байсан ба өдгөө 35 настай, 1979 онд төрсөн нэгэн байсан. Эхнэр, хүүгийн хамт амьдардаг байжээ. Цагдаагийн байгууллагын урьдчилсан  дүгнэлтээр түүнийг толгойруугаа цохиулж амиа алдсан гэж үзэж байгаа аж. Гэвч Шүүх шинжилгээний нарийн мэргэжлийн дүн хараахан гараагүй байгаа юм.  Харин бэртэж, гэмтээд өдгөө эмнэлэгт хэвтэж байгаа ажилчныг Даваацэрэн гэдэг байжээ.
Тэгвэл хүн барьцаалсан этгээдийн хувьд 1989 онд төрсөн. Дорнод аймгийн харьяат иргэн бөгөөд урд нь танхайн хэргээр  цагдаагийн байгууллагад шалгагдаж байсан.Өнгөрсөн сарын 12-нд тус компанид цэцэрлэгчээр шинээр ажилд орсон. Эхнэр, хүүхэдгүй эцэг эхийн хамт амьдардаг. Бага боловсролтой нэгэн байжээ.

Барьцаалагч этгээд нэг иргэнийг хөнөөж, бас нэг иргэнийг бэртээгээд зогсохгүй хоёр оюутны биед ч халдсан талаар зарим эх сурвалжууд хэлж байна. Улмаар хоолойндоо хутга тулгуулсан хоёр иргэн одоогоор эмнэлэгт хэвтэж байгаа юм байна.

Юутай ч тухайн хэрэгт цагдаагийн байгууллагынхан маш сайн ажилласан талаар тэнд байрлаж байсан оюутнууд, гэрч ч хэлж байна. Үнэхээр цагдаа шуурхай ажиллаж, арга хэмжээ авч чадаагүй бол өнөөдөр гэмт этгээдийн гарт хэдэн ч иргэн амиа алдсан байхыг үгүйсгэхгүй юм.