Улсын Дээд шүүхийн хяналтын шатны эрүүгийн хэргийн шүүх хуралдаанаар Ч.Баттуул, Ж.Батчулуун, Б.Отгонбаяр нарт холбогдох эрүүгийн хэргийг өчигдөр хянан хэлэлцээд анхан болон давж заалдах шатны шүүхийн шийдвэрийг хэвээр үлдээсэн.

Тэгвэл Ч.Баттуулын өмгөөлөгч болоод ар гэрийнхэн нь цаашид хэрхэх талаар утсаар холбогдож тодрууллаа.

Ч.Баттогтох өмгөөлөгч хэлэхдээ "Бид 30 хоногийн дараа Дээд шүүхийн шүүгч нарын бүрэлдэхүүнд хандана гэж төлөвлөөд байна. Ямар ч зүйл ангийг нь өөрчлөхгүй, ялыг нь бууруулаагүйд мэдээж гомдолтой байна. Миний хувьд өнөөдөр биеийн байдал тааруу байгаа учир шүүх хуралдаанд сууж чадсангүй" гэв.

Харин Ч.Баттуулын аав Н.Чулуунбаатартай холбогдоход "Юу ч хэлэхэв дээ. Үнэхээр шударга бус санагдаж байна. Прокуророос нэг зүйл ангийг нь хэрэгсэхгүй болгох санал тавьсаар байхад авч хэлэлцсэнгүй. Сэтгэл санаа маш хүнд байгаа учир өөр дэлгэрэнгүй зүйл ярих боломж алга" гэв.

Хэргийг сөхөхөд, Ч.Баттуул нь 2012 оны 1 дүгээр сарын 6-ны шөнө 2 цагийн орчим Төв аймгийн Эрдэнэ сумын нутаг дэвсгэрт байрлах “Цонжин болдог” гэх газраас 17 орчим км зайд АНУ-ын иргэн Жон Мартин Кийнийг “Сайга М3” загварын буугаар буудан алсан гэмт хэргийг үйлдсэн гэж яллагдаад байгаа. Мөн 2012 оны 1 дүгээр сарын 7-ноос 8-нд шилжих шөнө Б.Отгонбаяр, Ж.Батчулуун нарын хамт хохирогчийн цогцсыг 6.3 км зайд автомашинаар чирж аваачин шатаасан гэж хуулийнхан үзээд байгаа юм.

Улмаар Сонгинохайрхан дүүргийн шүүх 2013 оны 11 дүгээр сарын 14-ний өдөр дээрх хэргийг анхан шатны журмаар хянан хэлэлцээд Нийслэлийн прокурорын газраас  Ч.Баттуулд Эрүүгийн хуулийн тусгай ангийн 91 дүгээр зүйлийн 91.2.6, 91.2.13 дахь хэсэгт заасан гэмт хэрэгт холбогдуулан яллах дүгнэлт үйлдэж ирүүлсэн хэргийг хэрэгсэхгүй болгожээ. Харин Ч.Баттуулыг шунахайн сэдэлтээр, өс хонзонгоор, онц харгис хэрцгий аргаар хүнийг санаатай алсан гэмт хэргийг үйлдсэн гэм буруутайд тооцож, Эрүүгийн хуулийн тусгай ангийн 91.2.1, 91.2.3. 91.2.12 дахь хэсэгт зааснаар 23 жил хорих ял оногдуулж, уг ялыг чанга дэглэмтэй эмэгтэйчүүдийн хорих ангид эдлүүлэхээр шийдвэрлэсэн юм.

Мөн Ж.Батчулуун, Б.Отгонбаяр нарыг хүнийг санаатай алсан гэмт хэргийг урьдчилан амлалгүйгээр нуун далдалсан гэмт хэргийг үйлдсэн гэм буруутайд тооцож, Эрүүгийн хуулийн тусгай ангийн 247 дугаар зүйлийн 247.1 дэх хэсэгт зааснаар тус бүр 2 жил хорих ялаар шийтгэж, Эрүүгийн хуулийн ерөнхий ангийн 63 дугаар зүйлийн 63.1 дэх хэсэгт зааснаар Ж.Батчулуунд хорих ял оногдуулсан шийтгэх тогтоол биелүүлэхийг 1 жилийн хугацаагаар хойшлуулсан аж.

Эрүүгийн хэргийн давж заалдах шатны 10 дугаар шүүх уг хэргийг 2014 оны 2 дугаар сарын 27-ны өдөр хянан хэлэлцээд Ч.Баттуулыг онц харгис хэрцгий аргаар хүнийг санаатай алсан гэм буруутай хэмээн тооцож Эрүүгийн хуулийн 91.2.12 дахь хэсэгт зааснаар яллах дүгнэлт үйлдэж ирүүлсэн хэргийг хэрэгсэхгүй болгож, Ч.Баттуулыг шунахайн сэдэлтээр, өс хонзонгоор хүнийг санаатай алсан гэм буруутайд тооцон, түүнд анхан шатны шүүхээс оногдуулсан 23 жилийн хорих ялыг хэвээр үлдээсэн нь энэ юм.