Нигерийн 200 гаруй охиныг хулгайлан авч явсан Боко Харам бүлэглэл тосгоны 300 иргэнийг хяджээ. Нигерь, Камеруны хилийн ойролцоох Гамбору Нгала хотод зэвсэгт этгээдүүд дайран орж, зугтахыг завдсан хүмүүсийг амьдаар нь шатаасан байна. Нигерийн сенатч Ахмед Занна нас барсан хүмүүсийн тоо 300-д хүрээд байгаа талаар мэдээлэв. Тус хотоос сонгогдсон сенатч Занна эндхийн цэргүүд хулгайлагдсан охидыг аврахаар Чад мөрөн рүү явсан учир иргэд ямар ч хамгаалалтгүй байсан гэв. Гэрчүүдийн мэдээлж буйгаар Боко Харамын дайчид зэвсэг ачсан ачааны машин, мотоцикл унаж шөнө дундуур дайран иржээ. Африк тивийн хамгийн том эдийн засагтай Нигерь улсыг үймүүлж буй Боко Харамын хэт даврагчдаас энгийн иргэдийг аврах ажилд АНУ, Их Британи, Хятад зэрэг орнууд нэгдэхээ мэдэгдсэн билээ.