Нэгдүгээр эгнээнд машинаа тавьсан бол ачдаг болоод багагүй хугацаа өнгөрч байгаа. Тэгвэл энэ хугацаанд иргэдээс шүүмжлэл, эсэргүүцэл ирсээр байсан. Учир нь  нэгдүгээр эгнээнд тавьсан машинуудыг ачих эрхийг авсан хувийн компаниуд мөнгөний араас хэт улайрч машиныг сэвтүүлэх зэргээр асуудал гаргаж эхэлсэн. Өөрөөр хэлбэл, машин ачдаг компаниуд хүний эд хөрөнгөнд хэтэрхий хайхрамжгүй ханддагийг олон иргэн мэддэг болсноор энэ үйлчилгээ иргэдийг бухимдуулах болсон.
Эдгээр компаниуд иргэдийн машинтай гамгүй харьцдагаас гадна өөр янз бүрийн асуудал гаргах нь энүүхэнд.  Тухайлбал,  хэдхэн сарын өмнө  зургаан настай хүүхдийг машинтай нь хамт журмын хашаанд хийсэн хэрэг ч гарч байсан билээ.

Тэгвэл энэ сарын 7-нд ачигч машин зам тээврийн ноцтой осол гаргасан талаарх мэдээллийг бид хүргэсэн. Гэвч ямар компанийн жолооч осол гаргаж, хүүхдийн биеийн байдал хэр байгаа талаарх мэдээлэл хомс байсан юм. Тиймээс хэргийг зарим эх сурвалжаас асууж тодрууллаа.
 Тухайн осол Их Засаг их сургуулийн ойролцоо болсон бөгөөд долоон настай хүүхдийг гарцаар гарч байхад “UMT” компанийн жолооч дайрч хүнд гэмтээжээ.

Хүү гурван метр орчим газар шидэгдэж одоо хүртэл ухаан ороогүй байгаа аж. Хүүд хэд хэдэн хүнд хагалгаа хийлгэх хэрэгтэй байгаа ч хүүгийн зүрх дийлэхгүй учраас хагалгаа хийж амжаагүй байгаа талаар эх сурвалж хэлж байна.
Харин осол гаргасан ажилтанд машин яаралтай ачих хэрэгтэй байна. Хурдан ирээрэй гэсэн дуудлага иржээ. Тиймээс Сансараас Их Засаг хүртэлх зам түгжрэлтэй байсан учраас эсрэг урсгал руу орж явж байгаад зам гарч явсан хүүг мөргөсөн талаараа мэдүүлээд байгаа аж.

Хүү маш хол шидэгдэж хамар амнаас нь цус гараад хөдөлгөөнгүй болсон хэмээн гэрчүүд ярьж байна. Ямартаа ч жолооч Г-д Замын хөдөлгөөний дүрмийн 8.4 заасан заалтыг зөрчсөн хэмээн эрүү үүсгэн шалгаж байгаа юм байна.