Украины зүүн хязгаарт орших Донецк хотын сонгогчид Оросын босогчдын талд саналаа өгсөнөөр тус бүс нутаг Украинаас салан тусгаарлаж, өөртөө засах муж болохыг дэмжсэн байна. Өөртөө засах Бүгд найрамдах Донецк ард улс болохыг сонгогчдын 75 хувь нь санал хураалтад оролцон 89 хувь нь дэмжсэн болохыг сонгуулийн хороо мэдээлэв. Харин Луханск хотод явагдаж буй санал хураалтын дүн хараахан гараагүй байна. Донецк хотод санал хураалттай зэрэгцэн эмх замбараагүй байдал газар авч нэг хүн амиа алджээ. Энэ хэргийн бурууг Орос, Украинчуудын аль аль нь зөвшөөрөхгүй байгаа ажээ. Энэ хооронд Словянскт санал хураалт хэвийн явагдаж байна. Гэхдээ Украины талыг дэмжигч нэгэн багшийг сургуулийг нь санал хураах байр болгон ашиглахаас татгалзсаных нь төлөө ална хэмээн сүрдүүлжээ. Сонгогчид “Та Бүгд найрамдах Донецк/Луханскыг өөртөө засахыг хүлээн зөвшөөрч байна уу?” гэсэн ганцхан асуултанд хариулах юм. Санал хураалтыг зохион байгуулагчид энэ сарын 25-нд болох Украины ерөнхийлөгчийн сонгуулийг үл харгалзан ОХУ-д нэгдэх дараагийн шатны санал хураалтыг долоо хоногийн дотор зохион байгуулахаар төлөвлөж байна. Харин АНУ, Европын холбоо Украины дотоод зөрчил иргэний дайны шинжтэй болж буйг сануулжээ.