Хятадын Ханжоу хотод хог шатаах үйлдвэр барихыг эсэргүүцсэн иргэдийн жагсаалын үеэр эмх замбараагүй байдал үүсч 39 хүн гэмтэж бэртсэн байна. Эдгээр хүмүүсийн 29 нь цагдаагийн албан хаагч, 10 нь энгийн иргэд юм. Тэмцэгчид Ханжоу хотын хурдны замыг хааж, эрүүл мэндэд ноцтой аюултай шийдвэр гаргах гэж буй эрх баригчдыг эсэргүүцсэн байна. Тус үйлдвэрийг ашиглалтад оруулсанаар 5000 гаруй тонн хог хаягдлыг өдөрт шатааж, хөрсийг ихээхэн бохирдуулах юм. Засгийн газар уг төслийг хэрэгжүүлэхдээ байгальд ээлтэй орчин үеийн технологи ашиглана гэдгээ амласан байна. Гэвч ширүүн эсэргүүцэлтэй тулгарсан тул мэргэжлийн судлаачид, орон нутгийн удирдлага, төсөл хэрэгжүүлэгчид, иргэдийн дунд уулзалт зохион байгуулсаны дараа асуудлыг шийдвэрлэхээр болжээ.