Өнгөрсөн пүрэв гарагт Шархадны уулан дээрээс хоёр охиныг зэрлэгээр хөнөөсөн хэрэг гарсан. Тэгвэл албаны эх  сурвалжийн мэдээлж буйгаар амиа алдсан хоёр охин нэг нь 19 настай, нөгөө 20 орчим насных байсан байна. Хэргийн талаар ЦЕГ-ын хэвлэл мэдээллийн төвийн дарга, цагдаагийн хурандаа Б.Баатархүү болоод Нийслэлийн цагдаагийн газрын гэмт хэрэгтэй тэмцэх хэлтсийн Хүнд, онц гэмт хэргийн мөрдөн шалгах хэлтсийн ахлах мөрдөн байцаагч хошууч Д.Энхболд,  Баянзүрх дүүргийн цагдаагийн нэгдүгээр хэлтсийн мөрдөн байцаагч, цагдаагийн ахмад Б.Ганбаатар мэдээлэл хийлээ.

Амиа алдсан хоёр охин гэмт этгээдтэй энэ сарын 6-ний өдөр найзаараа дамжуулж танилцсан байна. Улмаар тухайн өдөр Шар хадны цайз 16-д байрлах бааранд танилцсан этгээд болоод зуулчилсан найзтайгаа үйлчлүүлж байсан аж. Ингээд баарнаас гараад зуучилсан гэх З-гийн гэрт очсон байна. Гэвч гэмт этгээд хоёр охиныг авч гарсанаар, энэхүү бусармаг хэргээ үйлджээ.

Юутай ч хэргийн талаар ЦЕГ-ын хэвлэл мэдээллийн төвийн дарга, цагдаагийн хурандаа Б.Баатархүүгээс зарим зүйлийг тодрууллаа.

-Хэрэг яг хэдний өдөр гарсан бэ?
-Энэ сарын 8-ний өдрийн 20.00 цагт цагдаагийн байгууллагад дуудлага ирсэн. Тодруулбал, Баянзүрх дүүргийн есдүгээр хороо “хар хошуу” гэдэг уулын орой дээр, овооны хажууд хоёр эмэгтэй  хүний цогцос байна гэсэн мэдээлэл ирсэн. Үүний дагуу Баянзүрх дүүрэг дэх цагдаагийн хэлтэс, Нийслэлийн гэмт хэрэгтэй тэмцэх газар, ЦЕГ-ын гэмт хэрэгтэй тэмцэх газрын алба хаагчид хэргийн газрыг өргөн маршрутаар хамгаалалтанд авч, хэргийн газрын үзлэгийг нийт гурван удаа хийж явуулсан. Өөрөөр хэлбэл, томоохон самналтуудыг хийсэн.

-Хэргийн эд мөрийн баримтуудаар хохирогчдыг хөнөөсөн байж болзошгүй зүйлүүдийг илрүүлсэн үү?
-Нийт 61 эд зүйлийг эд мөрийн баримтаар бэхжүүлж, хэрэгт хавсаргасан.
Хохирогч болсон хоёр эмэгтэйн нэг нь 1995 онд төрсөн Өвөрхангай аймгийн харьяат, нөгөө нь 1994 онд төрсөн Ховд аймгийн харьяат хоёр эмэгтэй болох нь тогтоогдсон.

-Сэжигтэн этгээдийг баривчилсан гэж үнэн үү?
-Гэмт хэрэг илрүүлэхэд ЦЕГ-ын холбогдох албан тушаалтнаар ахлуулсан ажлын хэсэг ажлаад гурван удаа үзлэгийг нөхөн хийж, хэрэгт ач холбогдол бүхий баримтуудыг олж илрүүлж чадсаны үр дүнд 48 цагийн хугацаанд хэргийг үйлдсэн байж болзошгүй сэжигтэн этгээдийг баривчлаад хоёр этгээдийг  хорьсон.

-Хэргийг үйлдсэн байж болзошгүй гэх этгээд хэдэн настай, ямар ажил хөдөлмөр эрхэлдэг вэ?
-1991 онд Өвөрхангай аймагт төрсөн. Бүрэн дунд боловсролтой. Мэргэжилгүй. Эрхэлсэн тодорхой ажилгүй И гэгч этгээд болох нь тогтоогдож байгаа. Энэ хүн өмнө нь Сонгинохайрхан дүүргийн шүүхээр эрүүгийн хуулийн 99.1 дүгээр зүйлд зааснаар нэг сарын баривчлах ялаар шийтгүүлж байсан. Одоо бол тухайн хэргийн үйлдсэн байж болзошгүй И, тухайн хэргийн хохирогч нартай хамт архидан согтуурсан З нарыг энэ гэмт хэрэгт сэжигтнээр татаад 461 дүгээр ангид хорьсон байгаа.

-Хэрэг үйлдэгдэх болсон шалтгаан урьдчилсан байдлаар юу гэж тогтоогдож байна?
-Гэмт хэргээ үйлдсэн байж болзошгүй сэжигтэн этгээд И нь тухайн хохирогчдыг урьд нь танидаггүй байсан байгаа юм. Харин найз З-гээр дамжуулж энэ сарын 6-ны өдөр танилцаад, энэ дөрөв хамт бааранд орж архидан согтуурсан байгаа. Орой нь З-гийн гэрт ирж байж байгаад, И нь хоёр хохирогчийг дагуулж гараад амь насыг нь хохироосон байгаа.

-Сэжиглэгдэж байгаа этгээд мэдүүлгээрээ хэргээ хүлээн зөвшөөрч байгаа юу?
-Эхэндээ гэмт хэрэг үйлдээгүй гэж мэдүүлж байсан. Хангалттай нотлох баримтуудыг цагдаагийн ажилтнууд баримтжуулж авч чадсанаараа хурууны хээ, эд мөрийн баримт, гэрчийн мэдүүлгээр тулгуурласан тул И өөрөө гэмт хэрэг үйлдсэнээ хүлээж байгаа.  Түүний мэдүүлгээр тухайн хоёр хохирогчтой архи ууж байгаад маргалдаж улмаар нэгнийх нь амь насыг танхайн сэдэлтээр хохироогоод нөгөө хохирогчийнх нь амь насыг онц хэрцгийгээр хохироосон болох нь эхний байцаалт мэдүүлгээр тогтож байгаа.

-Гэрчээр хэчнээн хүнийг байцааж байна?
-Үйлчлүүлсэн дэлгүүрийн эзэн, тэр хавийн оршин суугчид гэрчийн мэдүүлэг өгч байгаа. Одоо мөрдөн байцаалтын ажиллагаа явагдаж байна.

-Эрүүгийн хэрэг үүсгэсэн үү?
-Эрүүгийн хуулийн 91 дүгээр зүйлийн 91.2.16-д заасан зүйл заалтаар хэрэг үүсгэсэн.

-Сэжигтнийг Эрдэнэтээс барьсан гэж үнэн үү?
-Нэг сэжигтэй этгээдийг Дарханаас, нөгөөг нь Улаанбаатар хотоод баривчилсан байгаа.

-Толгойг нь тасдасан гэсэн. Хэр үнэн бодитой мэдээлэл вэ?
-Чулуу өрсөн овоон дээр чулуугаар булагдсан байдалтай толгойн хэсэг тасдагдсан, биедээ олон тооны гэмтэл шархтай байсан гэж гэрчүүд мэдүүлж байгаа. Одоогоор толгой юунаас болж тасарсаныг шүүх шинжилгээгээр тогтооно. Хатуу мохой зүйл буюу чулуугаар хохирогчдын толгойруу цохисон гэдгээ сэжигтэн хүлээж байгаа. Архи уусан, ямар хэмжээний согтолттой байсан нь шинжээчийн дүгнэлтээр гарна.

-Толгой нь айлын хашаа руу өнхөрч орсон байсан. Мөн оюутны байрны оюутнууд олсон. Улмаар оюутнуудыг байцаасан гэх мэдээлэл байна?
-Толгой ямар хүчин зүйлсийн нөлөөгөөр тасдагдсан байна гэдгийг шалгаж байна. Мөн толгой айлаас олдсон гэх мэдээлэл худлаа. Хэргийн газар дээрээс толгой олдоогүй, эрэн сурвалжлах ажиллагааг явуулж байна.

Хохирогч:
1.    1995 онд төрсөн, эмэгтэй, Өвөрхангай аймгийн харьяат, БЗД-ийн 19-р хороонд оршин суудаг, бүрэн дунд боловсролтой, эрхэлсэн тодорхой ажилгүй “Б”.
2.    1994 онд төрсөн, Ховд аймгийн харьяат, бүрэн дунд боловсролтой, эрхэлсэн тодорхой ажилгүй “X”.

Сэжигтэн:
1.    1991 онд төрсөн, эмэгтэй, Өвөрхангай аймгийн харьяат бүрэн дунд боловсролтой, мэргэжилгүй, эрхэлсэн тодорхой ажилгүй “И”, 2012.05.31-нд СХД-ийн шүүхээр 99-99.1 дэх зүйл ангид зааснаар 1 сарын баривчлах ял шийтгүүлсэн гэх.
2.    1990 онд төрсөн, БЗД-ийн 20-р хороонд оршин суудаг, эрхэлсэн тодорхой ажилгүй “3”