Туркт нүүрсний уурхай дэлбэрч 270 хүн амь насаа алдаж, занганд орсон 110 гаруй хүнийг аврахаар тэмцэж байгаа энэ үед ерөнхий сайд Рэжеп Таийп Эрдоганы хэлсэн үг олон нийтийг бухимдуулж байна. Эрдоган “Манай улсын 77 сая иргэний сэтгэлийг шархлуулсан эмгэнэлт явдал боллоо. Иймэрхүү уурхайн осол байнга гарч байдаг. Энэ бол дэлхий дээр огт болдоггүй зүйл биш” хэмээн 1862 оноос хойш гарсан уурхайн ослуудын жагсаалтаас иш татан ярьжээ. Хайртай хүмүүсийнхээ төлөө эмнэлэгт залбирч буй мянга мянган гэр бүл шаналж байхад Эрдоган уурхайд осол гаргасан компанийг өмөөрсөн өнгө аястай мэдэгдэл хийсэнд дургүйцэх хүн олон байна. Уурхайн оператор Комур Ислетмелери осол гарах үед ажиллаж байсан 787 уурхайчны 450-ыг нь цооногоос гаргаж авсан ч дийлэнх нь нүүрсхүчлийн исэлд хордож нас барсан гэж мэдээлжээ. Уг бодист хордсон хүн 3-5 минутын дотор амьсгал хураадаг хэмээн оператор тайлбарлаж байна. 
