Бангладешт хүчтэй салхи шуурч буйтай зэрэгцэн 200 орчим зорчигчтой MV Miraj-4 гатлага онгоц хөмрөгдөж осолджээ. Осол нийслэл Дака хотоос өмнө зүгт орших Мунжиранж дүүргийн Мегна голд болсон аж. Одоогоор 12 хүн нас барсан болохыг тогтоож, сураггүй алга бологсдыг хайж байна. Бангладешийн алслагдсан нутгуудад жил бүр усан онгоц осолдож хүний амь эрсэддэг ч даац хэтрүүлсэн эсвэл чанаргүй хөлөг ашигласан гэдэг шалтгаанаар тайлбарласаар иржээ. Хөдөөгийн иргэдийн гол тээврийн хэрэгсэл болсон гатлага онгоц осолдох нь нийтлэг үзэгдэл гэнэ. 2012 оны гуравдугаар сард Мегна голд зорчигч тээврийн онгоц, газрын тос зөөвөрлөгч хөлөгтэй мөргөлдсөний улмаас 112 хүн амиа алджээ. Осол гарах бүрт аюулгүй ажиллагааг мөрдөөгүй эрх баригчдыг буруутгаж байгаад тэгсхийгээд намждаг байна.