Украины цэргүүд Донецк хотын нисэх буудлыг ахин хяналтандаа авах гэсэн боловч Оросын буутай этгээдүүд болон Засгийн газрын тусгай хүчний хооронд ширүүн тулаан боллоо. Донецк хотын захиргаа тулааны уршгаар амь үрэгдсэн хүмүүсийн тоог нийтэд мэдээлээгүй байна. Оросын босогчид нисэх онгоцны буудлыг эзэлсэний дараа Киевийн тал агаараар довтлохоор нисдэг тэрэг, байлдааны онгоцуудыг байршуулсан байна. Донецк хотод ерөнхийлөгчийн сонгуульд оролцох гэсэн Орос иргэдэд боломж олдоогүй, санал өгөх байр ч байгаагүй хэмээн босогчид шүүмжилж байна. Украины шинэ ерөнхийлөгч Петро Прошенко Оросын эрх баригчидтай хэлэлцээр хийж, хямралыг зогсоохыг хүсч буйгаа илэрхийлсэний дараа нисэх онгоцны буудал босогчдод эзлэгдсэн ажээ. Оросын гадаад хэргийн сайд Сергей Лавров Прошенкотой хэлэлцээр хийхэд бэлэн байгаа ч эхлээд босогчдын эсрэг хүч хэрэглэхээ зогсоо гэдэг шаардлага тавьжээ. Украины гадаад хэргийн сайдаар ажиллаж байсан, чихрийн үйлдвэрийн магнат, тэрбумтан Прошенко сонгогчдын 54 хувийн санал авч ерөнхийлөгч болсон билээ.