Өнгөрсөн дөрөвдүгээр сард осолдож 300 гаруй хүний аминд хүрсэн “Sewol” хөлгийг эзэмшигч “Chonghaejin Marine” компанийн захирал Ю Бен Ын бизнесмэн хариуцлагаас мултарч, оргон зугтсан билээ. Тэгвэл түүний охин 47 настай Ю Сом Наг олон улсын сүлжээгээр дамжуулан Парис дахь гэртээ байхад нь баривчилжээ. Парис хотын шүүх Ю Сом Наг Солонгосын талд шилжүүлэн өгсөн байна. Прокурорууд хөлөг осолдсон нь даац хэтрүүлсэнтэй холбоотой болохыг тогтоосон ч компанийн эзэн гэм буруугаа хүлээгээгүй юм. Цагдаа нар оргон зугтсан Ю Бен Ын ноётны талаар мэдээлэл өгсөн хүнд 500 мянган долларын шагнал өгөхөө амлажээ. Өнгөрсөн долоо хоногт цагдаа нар түүний Баптист сүмд дайран орсон ч аль хэдийнэ зугтсан байсан юм. Ю бизнесмэнийг татвараас зугтааж, хууль бусаар мөнгө шамшигдуулсан, осолд буруутай гэдгээ хүлээн зөвшөөрөөгүй гэж үзэж байна. Мөн түүний том хүү Ю Дэ Кюныг эрэн сурвалжилж байгаа бөгөөд үнэн зөв мэдээлэл өгсөн хүнд 100 мянган доллар амлажээ.