Бидний тийм ч сайн мэддэггүй Мьянмар улсад лалын шашинтнуудыг ялгаварлан гадуурхах явдал тасрахгүй байна. Буддын шашинтнууд түлхүү амьдардаг энэ улсын Засгийн газар лал шүтэгсдэд эмнэлгийн тусламж хүргэдгүйгээс болоод хүүхэд, жирэмсэн эхчүүд амиа алдсаар байгаа ажээ. Энд гадаадын сэтгүүлчид бараг очдоггүйгээс гадна хүмүүнлэгийн тусламж хүргэх нь маш хязгаарлагдмал гэнэ. 60 сая хүн амтай Мьянмарт сүүлийн хоёр жилийн турш шашны бүлэглэлүүдийн тэмцэл гарсан нь ийм хатуу шийдвэр гаргахад нөлөөлсөн бололтой. Баруун зүгт орших Ракхайн мужид өрнөсөн тэмцлээс болоод 240 хүн алагдаж, 250 мянган хүн дүрвэсний дийлэнх нь лалын шашинтнууд юм.