Польш улсад коммунизм нуран унасны 25 жилийн ойгоор АНУ-ын ерөнхийлөгч Барак Обама Варшавт айлчилж, тус улсад явагдаж буй Натогийн цэргийн сургуулилтад 1 тэрбум доллар хандивлана гэдгээ мэдэгджээ. Тэрээр Украины ерөнхийлөгч Петро Порошенкотой уулзаж улс орноо тогтвортой болгоход нь тусална гэдгээ амласан байна. Мөн 5 сая долларын цэргийн зэвсэг нийлүүлэхээр тохиролцов. Б.Обама “Би ерөнхийлөгч Порошенкод хосгүй боломж байгаа гэж бодож байна. Тэр гараа цусанд будаагүй. Тэгэхээр энэ үймээнийг зогсоож, яриа хэлэлцээрийг эхлүүлнэ гэдэгт итгэдэг” хэмээн ярьжээ. Энэ хооронд Луханскт салан тусгаарлагчид хоёр цэргийн баазыг хяналтандаа аваад байна. Мөн хэдэн өдөр үргэлжилсэн тулааны дараа хилийн хамгаалалтын албыг бүсэлж эхэлжээ. Украины Донецк, Славянск хотуудад тулаан үргэлжилсээр байна.