Хэрэв таны ажлын байранд цэвэрхэн бие засах газар байхгүй бол дараах мэдээллийг уншаад үзэхэд илүүдэхгүй биз ээ. Тайландын автобусны кондукторуудад бие засах засварлага олддоггүй учир том хүний живх өмсөж хэвшжээ. Ингэж бохир нөхцөлд ажилладаг учир кондукторууд шээсний замын халдвараар өвчлөх нь нийтлэг байдаг ажээ. Кондуктор Ватчари Вирияа “Би өдөрт хоёр удаа живх хэрэглэдэг байсан. Саяхан умайн хорт хавдартай болсоноо мэдсэн” хэмээн ярьсан байна. Тайландын кондуктор эмэгтэйчүүдийн 28 хувь нь 16 цагийн дотор ганц живх сольдгийг мэргэжлийн судалгааны байгууллага тогтоосон нь аймшигтай үзүүлэлт юм. Улс төрийн хямрал нүүрлэсэн энэ улсад иргэдийнхээ хөдөлмөрийн аюулгүй байдлыг хангаж чадахгүй байгаагийн нэг жишээ энэ билээ. Энд баян, бизнесмэн хүмүүст илүү боломж олгодог ч жирийн ажилчдын эрх ашгийг хамгаалж чадахгүй байна. Кондукторууд өдөрт 300 бахт буюу 10 долларын хөлс авахын төлөө хоол идэх ч завгүй ажилласаар цусны даралт ихсэх, ходоодны хорт хавдар тусах зэрэг эрсдэлтэй болдог юм.