Холбоотны цэргийн десэнт Нормандад буусны 70 жилийн ой Францад болж, дэлхийн удирдагчид цугларав. Энэхүү арга хэмжээнд Барууны удирдагчдаас гадна ОХУ-ын ерөнхийлөгч Владимир Путин хүрэлцэн ирсэн учир Украины хямралын асуудлаар ярилцах нь тодорхой болж, дэлхийн хэвлэлийн анхаарлын төвд байлаа. Хэвлэлүүдэд мэдээлж буйгаар АНУ-ын ерөнхийлөгч Барак Обама, ОХУ-ын ерөнхийлөгч Владимир Путин нар 10-15 минутын хугацаанд албан бусаар уулзсан ажээ. Тэд Украины хямралын асуудлаар биш хувийн яриа өрнүүлсэн гэж АНУ-ын үндэсний аюулгүй байдлын зөвлөх Бен Рожес ярьсан байна. Гэхдээ Б.Обама Украины шинээр сонгогдсон ерөнхийлөгч Петро Порошенкод Оросын салан тусгаарлагчдын бослогыг зогсооход туслана гэдгээ Путинд илэрхийлсэн гэж BBC агентлаг мэдээлжээ. Мөн Крымийн асуудалтай холбоотойгоор Европын холбоо, АНУ хамтран ОХУ-ын эсрэг нэмэлт хориг арга хэмжээ авч буйг мэдэгдсэн байна. Дээрх арга хэмжээний үеэр Украины ерөнхийлөгч Петро Порошенко, Германы канцлер Ангела Меркель, Владимир Путин нар уулзаж, хэсэг хугацаанд ярилцсан гэсэн мэдээлэл байна.
Сэтгэгдэл (3)