Украины зүүн нутгийн Славянск хотод засгийн газрын цэргүүд болон Оросыг дэмжигч салан тусгаарлах үзэлтнүүдийн хооронд өчигдөр ширүүн тулаан болсон талаар BBC агентлаг мэдээллээ. Тус улсын шинээр сонгогдсон Ерөнхийлөгч Петро Порошенко нийслэл Киев хотноо өчигдөр өглөө тангараг өргөсөн билээ.

Өчигдөр үдээс хойш Донецк мужид засгийн газрын хүчнүүд их буугаар халдсан гэж салан тусгаарлах үзэлтнүүдийн төлөөлөгч мэдэгдлээ. Хоёр тал уржигдар мөн буудалцсан юм. Гэхдээ төлөөлөгчийн хэлснээр, босогчид Украины түр засгийн газрын 20 хуягт тээврийн хэрэгслийг устгаж, тагнуулын нэг нисэх онгоцыг буудан унагаажээ.

Харин хүмүүнлэгийн тусламж тээвэрлэж явсан ачааны нэг нисэх онгоцыг салан тусгаарлах үзэлтнүүд буудан унагаасан гэж Украины засгийн газрын албаны хүмүүс мэдэгдлээ. ОХУ-аас Украин руу зэвсэгт бүлэглэлүүд нэвтэрч байсан хилийн шалган нэвтрүүлэх хэд хэдэн цэгийг хаасан гэж мөн тэд мэдэгдсэн билээ.