Шинзо Абегийн тэргүүлсэн Засгийн газар өөрсдийн тодорхойлсноор “Гурван үзүүрт бодлого” хэрэгжүүлж эхэлснээс хойш сүүлийн хориод жил явагдсан дефляци дуусгавар болж эдийн засаг нь сэргэлтийн шатанд ороод байгаа билээ. Тэгвэл Японы засгийн газар “гурван үзүүрт бодлого”-ынхоо эцсийн шатны баримт бичгүүдийг баталсан нь олон улсын анхааралд өртөөд байна.

Ерөнхий сайд Шинзо Абе “Бид бодит байдлаас зугтах аргагүй, эдийн засаг, аюулгүй байдал, дипломат харилцаа ямар ч сорилттой тулгарсан бид энэ бүхнийг өөрсдийн хүчээр даван туулах ёстой” хэмээн уг шийдвэрээ гаргасан талаар тайлбар хийжээ.

Энэхүү бодлогын хүрээнд нийтдээ 200 орчим арга хэмжээ авагдах ба аж ахуй нэгжүүдийн татварыг танаж, компаний засаглалд өөрчлөлт оруулах замаар хөрөнгө оруулалт инновацийг татах бодлого нь олон нийтийн анхаарлыг ихээр татаж байна. Мөн хөрөнгийн зах зээл, тэтгэвэрийн сангийн дүрэм журмуудыг өөрчлөх болсноо мэдэгджээ.

Түүнчлэн мөрийтэй тоглоомын эрх зүйн орчныг бүрдүүлэхээр хуулийн төслөө намрын парламентийн хуралдаанд өргөн барихаар болсон байна. Ингэснээр Токио 2020 оны зуны олимпоос өмнө  аялал жуулчлалын салбараа сэргээх боломжтой гэж үзэж байна.