ОХУ-ын Ерөнхийлөгч В.Путин Украйны хэрэг зөрчлийн улмаас шаардлагатай тохиолдолд тус улсад цэргийн хүч хэрэглэх эрхийг төрийн думаас аваад байсан. Ингэснээр ОХУ-ын цэрэг арми Украйны аюулгүй байдалд бодитой аюул занал учруулах боллоо гэж олон улсын ажиглагчид үзэж, АНУ, Барууныхан ч Оросын үйлдэлд хариу арга хэмжээ авч эхлээд байсан билээ. Тэгвэл Ерөнхийлөгч В.Путин Украйнд цэргийн хүч хэрэглэх эрхээ цуцлах саналыг төрийн думд өргөн барьж батлууллаа. Ингэснээр Олон улсын зүгээс ирж болох дараагийн шатны хориг арга хэмжээнээс сэргийлсэн зөв алхам хийлээ гэж ажиглагчид үзэж байна. Энэ тухай Ерөнхийлөгч В.Путин “Шийдвэрээ цуцалсан нь Украйнд болж байгаа үйл явдлыг анхаарахгүй гэсэн үг биш. Бид орос иргэдээ хамгаална. Мөн өөрийгөө гарал үүсэл, хэл соёлоороо ОХУ-тай холбоотой гэж үздэг Украйны иргэдийг ч мөн хамгаалах болно. Бид анхааралтай ажиглах төдийгүй шаардлагатай арга хэмжээнүүдийг авна. Гэхдээ цэргийн хүч хэрэглэх шаардлага гарахгүй гэж найдаж байна” гэж мэдэгджээ. Украйны хямрал эхэлснээс хойш нийтдээ 400 орчим хүн амь үрэгдээд байна гэж НҮБ-аас мэдээллэжээ.