Охидын хөлний хэлбэр, хэмжээг өөрчилж өндөр өсгийтэй гутал өмсөхөд эвтэйхэн болгох “Үнсгэлжин хагалгаа” маргаан дэгдээх болжээ. Энэ хагалгаагаар хөлний илүүдэл ясыг авч, өөхийг нь соруулсанаар өндөр өсгийт өмсөхөд тохиромжтой нарийхан хөлтэй болдог байна. Ингэснээр хоншоор хэсгээрээ нарийхан гутал өмсөхөд хөл холгож өвдөхгүй болно. Их Британи, Америк зэрэг орнуудад хүчээ авч буй энэ мэс ажилбарыг хийлгэхэд 7,500 долларын хөлс төлдөг. Ийм хагалгаа хийлгэсэн Паулина бүсгүй хөлөө нэг см хэмжээгээр багасгаж, удалгүй шархаа эдгээсэн байна. Гэвч хагалгааны дараа хэтэрхий их өвдөлт мэдрэгдэх, хэлбэр нь гаж болвол дахиж хагалуулах зэрэг хүндрэл үүсэх нь цөөнгүй ажээ.