Хятадын долоо хоног тутмын “Chongqing Youth News” сонин Япон үндсэн хуулиа өөрчилж, цэргийн хүчээ зузаатгах болсоныг эсэргүүцжээ. Тус сонин саяхны дугаартаа Японы газрын зурагт Хирошима, Нагасаки хотыг бөмбөгдөлтөнд өртөж, хар утаа суунаглаж буйгаар дүрсэлсэн байна. Япончууд дайныг дахин хүсч, хөрш орнуудаа өдөөн хатгаж байгааг шүүмжилсэн нь энэ юм. Дэлхийн хоёрдугаар дайнаас хойш Хятад, Өмнөд Солонгостой таагүй харилцаатай байх болсон Япон бусад улсын эсрэг цэргийн хүч ашиглахыг хориглосон үндсэн хуулиа өөрчлөх гэж байгаа нь маргаан дэгдээсэн. Харин Японы Гадаад хэргийн сайд Фумио Кишида Хятадын сонины хийсэн үйлдэлд харамсаж буйгаа илэрхийлсэн байна. Тэрээр сонины редакцитай заргалдана гэдгээ мэдэгджээ. Японы үе үеийн удирдагчид дайны гэмт хэргийнхээ төлөө уучлалт гуйсаар ирсэн юм.