Украины салан тусгаарлагчид МН17 онгоцны улбар шар өнгөтэй хар хайрцгийг дамжуулан үзэж буй бичлэг нийтэд цацагджээ. Нийт 25 км квадрат талбайг хамрах ослын газрыг салан тусгаарлагчид хяналтандаа авч, олон улсын шинжээчдэд ажиллах боломжийг бүрэн олгохгүй байгааг Барууныхан шүүмжилж байна. Эцсийн дүгнэлт гараагүй байгаа ч АНУ-ын төрийн нарийн бичгийн дарга Жон Керри “Орос хариуцлага хүлээх ёстой” гэж шууд мэдэгджээ.

    Украины ерөнхий сайдын орлогч Владимир Гройсман босогчид хар хайрцгийг хоорондоо хэдэн өдрийн турш дамжуулан үзсэн гэдэгт эргэлзэхгүй байгаагаа ярьсан байна. Тэрээр “Хар хайрцаг босогчдын гарт хэд хоносон учир онгоцонд юу тохиолдсоныг үнэнээр нь мэдэхэд төвөгтэй” гэжээ. Малайзын онгоцыг салан тусгаарлагчид буудсан гэж Украины Засгийн газар, Барууны орнууд үзэж байгаа. Тиймээс хар хайрцагны мэдээллийг босогчид өөрчилсөн байх магадлалтай гэж үзэж буйгаа нуусангүй. Хэвлэлд цацагдаж буй мэдээллээр онгоцыг санаатай буудсан байх магадлал хамгийн өндөр гэнэ. Украины арми, салан тусгаарлагчид агаарт нисч буй онгоцыг иргэнийх эсвэл цэргийнх гэдгийг дурангаар харж, тооцоолох боломжтой байсан гэж үзэж байна.