Өчигдөр Алжирын үндэсний агаарын тээврийн “Air Algerie” онгоц Буркина Фасогоос хөөрч 50 минутын дараа холбоо тасарсан тухай бид мэдээлсэн. Тэгвэл АН 5017 дугаартай онгоцны хэлтэрхийг Мали улсын хойд хэсгээс олсон хэмээн тус улсын ерөнхийлөгч Ибрагим Бубакар Кейта мэдэгдсэн байна. Онгоцны хэлтэрхийнүүд Агельхок болон Кидаль уулсын хооронд олдсон аж.

Онгоцонд 116 хүн зорчиж явсаны зургаа нь нислэгийн багийнхан юм. Зорчигчдын дунд 51 франц, Буркина-Фасо улсын 24 иргэн, 8 ливан, 4 алжир, Люксембург улсын хоёр иргэн, нэг бельги, нэг швейцарь, нэг нигер, нэг камерун, нэг украин, нэг румын хүн явсан ба багийн бүх гишүүд Испанчууд байсан гэнэ. Air Algerie агаарын тээврийн компани нь Алжир улсын үндэсний тээвэрлэгч томоохон компани юм. Тус компани нь Европ, Хойд Америк, Африк, Ойрхи Дорнодын 28 орны 39 хот руу тогтмол нислэг үйлддэг байна.