ОХУ-ын ээлж дараалан авч буй хориг арга хэмжээний хариуд ерөнхийлөгч Владимир Путин Европын орнуудаас ХАА-н бүтээгдэхүүн нийлүүлэхийг хориглосон. Тэгвэл энэхүү хориг Европын зах зээлд нөлөөлж болзошгүй байна. Францын хөдөө аж ахуйн үйлдвэрчний эвлэлийн удирдагчид гэхэд ерөнхийлөгч Олландтай яаралтай уулзалт зохион байгуулж, алдагдал нөхөн олговроо шаардахаар болжээ. Германд ажилгүйчүүдийн тоо хэдэн мянгаар өснө хэмээн тооцоолж байгаа бөгөөд иймэрхүү дүр зураг Европ даяар өрнөж байгаа аж.
     “Хоёр долоо хоногийн өмнө бид нэг килограмм улаан лоолийг 60 центээр борлуулж байсан бол одоо 10 центээр зарахад хүрээд байна” гэж Нидерландын фермер Роберт Зинкельс өгүүлжээ. Орост зориулсан бүтээгдэхүүнийг одоо тийш нь илгээх боломжгүй болж, өөр худалдан авагчийг хайхад хүрээд байгаа нь үнийн уналтад нөлөөлсөн байна.  Зөвхөн Голланд ч гэлтгүй, Испани, Итали, Грект ургацын оргил үе удахгүй эхлэх бөгөөд түүнийгээ хааш нь зарж борлуулах нь одоогоор ойлгомжгүй байгаа аж.
    Европын фермерүүдийн алдагдал 12 тэрбум еврогоор үнэлэгдэж байна. Ялангуяа Оросын ойрын хөршүүд болох Польш, Балтийн тэнгисийн орнууд, Болгар, Румын улсууд илүүтэй хэлмэгдэж байгаа бололтой.
Эдгээр учир шалтгаанаас үндэслэн, Грекийн Коммунист намаас Европарламентад суудалтай депутатууд ЕХ-ны дээд удирдлагад хандан “Оройтоогүй дээрээ хориг арга хэмжээгээ цуцал” гэсэн уриалгыг хүргүүлжээ.