Хятадын судлаачид манай дэлхийн хамгийн эртний мичний араг ясыг олж илрүүлсэн тухайгаа зарлалаа. Хятад улсаас олдсон мичинцэр маягийн амьтны яс одоогоос 55 сая жилийн тэртээ Ази тивд анх мич үүссэн болохыг баталж байгаа тухай шинжлэх ухааны нэр хүндтэй Нэйчур сэтгүүлд бичжээ. Арчибекус Ахиллес гэдэг энэхүү балар цагийн мичинцэр бол томоохон хулганын хэртэй биетэй байжээ. Судлаач нар энэхүү амьтны хоёр хэсэг араг ясны хэсгийг тоон сканнерт оруулан тооцоолж байгаад бүхэл араг ясны загварыг нь бий болгож чаджээ. Уг амьтан нь бяцхан нүдтэй, сармагчингийнх шиг атгадаг хуруунууд бүхий хөлтэй байжээ. Хятадын Сээр нуруутан амьтдын Палеонтологи, Палеоантропологийн институтын ажилтан Ни Жу Цзянь хэлэхдээ энэхүү араг яс нь маш эмзэг бөгөөд ховор зүйл байсан учраас араг ясыг нь сканнердахын тулд Дэлхийн хамгийн өндөр технологи болох синхротрон гэдэг багажийг ашигласан гэжээ. Хятадын Ардын Мэдээ сонинд бичсэнээр бол Арчибекус ахиллесын араг ясыг 2002 онд Хятадын төв Хебей мужид 55 сая жилийн настай хурдсын дундаас олж илрүүлсэн гэнэ. Харин уг яс манай Дэлхийн хамгийн эртний мичинцэрийнх байсан болохыг батлахын тулд эрдэмтдэд 10 жилийн уйгагүй хөдөлмөр шаардагджээ.