ХБНГУ-ын Сөрөг тагнуулын алба АНУ-ын Төрийн нарийн бичгийн дарга Жон Керри болон түүнээс өмнө энэ албыг хашиж байсан Хиллари Клинтон нарыг тагнаж, гар утсыг нь сэм чагнаж байсан гэнэ. Германы “Spiegel” сэтгүүлд бичсэнээр тусгай албаныхан тэдний яриаг бичиж авсан даруйдаа устгадаг байжээ. Энэ талаар тодруулахаар Ж.Керри Германы гадаад хэргийн сайд Франк-Вальтер Штайнмайертай ярьсан ажээ. Гэхдээ талуудын аль аль нь уг хэргийн талаар дэлгэрэнгүй мэдээлэл өгөхөөс татгалзаж байна.

    АНУ-ын Төрийн нарийн бичгийн дарга нарыг тагнаж байсан нь батлагдвал энэ нь германчуудын хувьд ихэд эвгүй явдал болно. Учир нь АНУ-ын Үндэсний аюулгүй байдлын алба Германы канцлер Ангела Меркелийг тагнаж байсан нь илэрсний дараа тус албаныхан “Түнш орнуудын хувьд тагнаж чагнах нь байж боломгүй зүйл” хэмээн эгдүүцэж байв. Энэ явдлаас болж хоёр орны харилцаа таагүй болсон билээ.