Өнгөрсөн долоо хоногт АНУ-ын Миссури мужийн Фергюсон хотод цагдаагийн ажилтан өнгөт арьст Майкл Браун гэх өсвөр насны хүүг буудан хөнөөснөөс үүдэн тус хотод олон нийтийг хамарсан эсэргүүцлийн жагсаал өрнөж байгаа. Дөрөв дэх өдрөө үргэлжилж буй жагсаалд Фергюсон хотын 20 мянга гаруй оршин суугч оролцсон юм.

Тэгвэл өчигдөр хэсэг оршин суугч тус хотын зэвсгийн агуулахыг эзлэхийг завдсанаас болж хотын дарга Жэй Никсон зарлиг гаргаж  Фергюсон хотод АНУ-ын тусгай хүчний 1000 гаруй цэргийг нэвтрүүлжээ.

Цэргүүд эсэргүүцэл үзүүлсэн, хүйтэн зэвсэгтэй иргэдийг баривчилж, зэвсгийн агуулахыг эзлэхийг завдсан этгээдүүдийг хот даяар эрэн сурвалжиж эхэлсэн байна. Тусгай ангийг удирдаж буй хурандаа Жон Хоун саатуулагдсан иргэдийг 10 хоног суллахгүй гэдгээ мэдэгдэж, оршин суугчдыг гэрээсээ гарахгүй байхыг сануулжээ. Хотын иргэд армийн цэргүүд хотод нь эрхээ тогтоож эхэлсэнээс үүдэж 10 гаруй дэлгүүр, түргэн хоолны газрыг шатааж эсэргүүцлээ илэрхийлсэн байна.

Хохирогч Майкл Брауны цогцсонд задлан шинжилгээ хийсэн шинжээчид түүнийг цагдаагийн офицер нийт зургаан удаа буудсанаас хоёр сум нь толгойд нь туссан хэмээв. Харин хүүгийн амийг хороосон цагдаа Деррин Уэлсонг мэдүүлэг өгөхөөс татгалзсан аж.