Хятадын ерөнхийлөгч Си Зиньпин Монголд хоёр өдөр айлчлахаар Улаанбаатарт ирлээ. Си Хятад, Монголын харилцаа уул, голоороо холбогдож, улам гүнзгийрч байна гэв. Тэрээр мөн Монголд ирсэн нь хамаатныдаа зочилж байгаа юм шиг санагдаж байна хэмээн сэтгэл хангалуун байгаагаа илэрхийлжээ. Түүнчлэн, Монгол-Хятад нь 4,700 км урт хилийн зурвасаар холбогдсон сайн хөршүүд гэсэн байна.
Си айлчлалын хугацаандаа ерөнхийлөгч Ц.Элбэгдорж болон бусад удирдагчидтай уулзаж ярилцахаар товложээ. Мөн УИХ-ын чуулган дээр үг хэлэх юм.
Энэ жил Монгол-Хятадын хооронд дипломат харилцаа тогтоосны 65 жилийн ой, Хамтын нөхөрлөлийн хэлэлцээрийг хянан батласны 20 жилийн ой тохиож байна. Си даргын айлчлал хоёр орны харилцаан дахь стратеги хамтын ажиллагаанд тэсрэлт авчирна гэж Хятадын ажиглагчид үзлээ. Хятад нь сүүлийн арав гаруй жилийн турш Монголын худалдааны хамгийн том түнш, гол хөрөнгө оруулагч байсаар ирсэн билээ. 2002 оны байдлаар Монгол-Хятадын худалдаа 324 сая ам.доллар байсан бол 2013 онд 6 тэрбум ам.доллар болж өсчээ. Энэ нь Монголын гадаад худалдааны тэн хагасыг эзлэж байгаа гэсэн үг.