НҮБ-ын Аюулгүйн зөвлөлийн тогтоолын дагуу Малайзын “Боинг” онгоцны сүйрлийн шалтгааныг тодруулахаар хийж буй мөрдөн шалгах ажиллагааны үр дүнг ил тодоор тогтмол мэдээлж байхыг Москва шаарджээ. Ослыг мөрдөн шалгаж буй ажлын явцын талаар Өрнөдийн хэвлэл, мэдээллийн хэрэгслийн ихэнх нь тушаал авсан юм шиг хоёр долоо хоног “ам нээгээгүй” гэж “Риа Новости” агентлагийн төлөөлөгч мэдээлэв.

    “Болсон явдлын хариуцлагыг ОХУ болон Украины салан тусгаарлагчдад үүрүүлэх гэж эхний үед бачимдаад байсан АНУ-ын албан ёсны төлөөлөгчид ч дуугаа хураачихлаа. Америкийн холбоотнууд, ялангуяа британичууд, австраличууд тэр үед оросуудыг буруутгагчдын тэргүүн эгнээнд явж байсан юм. Тэдний яриад байсан няцаагдашгүй баримтыг дэлхий нийт хүлээсээр байгаа ажээ. “Вашингтон, Лондон, Канберрагийн санаанд нийцэхгүй үр дүн гарч тун болзошгүй байх шиг” хэмээн тэрээр хэлэв.
    Эмгэнэлт явдлын учрыг тодруулахаар Киевийн хүсэлтээр Нидерландын тал ажиллаж буй юм. Онгоцны хар хайрцагны бичлэгийг тайлах ажлыг Их Британид хийж байна.