Хятадын эрх баригчид устөрөгчийн хэт ислээр бохирдуулсан 30 мянган тонн тахианы мөчийг хураан авчээ. Хүнсний сүлжээнүүд ийм тахианы махаар хоол хийснээс болоод хэрэглэгчдийн гэдэс өвдсөн гэсэн гомдол тасрахаа больсон ажээ. Хуурамч мах борлуулсан энэ хэрэгт 38 хүнийг баривчилж, 11 хүнийг сэжигтнээр татан шалгаж байна.

    Ус төрөгчийн хэт исэл хэмээх өнгөгүй химийн найрлагыг махыг цагаан болгож, ариутгах зорилгоор хэрэглэж байсан ажээ. Хэрэв уг химийн бодисыг хэрэглэвэл бөөлжих, гэдэс гүйлгэх шинж тэмдэг илэрнэ. Синьхуа агентлагийн мэдээлсэнээр Хятадын зүүн хэсэгт орших Жежиан мужийн Ёнжиагаас хамгийн анх хуурамч тахианы мах илэрсэн гэнэ. Дараа нь Гуандонг, Хенан, Анху, Жиансу мужийн есөн үйлдвэр ийм зөрчил гаргаж, дэлгүүрүүдэд махаа нийлүүлсэнийг тогтоолоо. Хятадад хэрэглэгчдийн эрхийг хамгаалах асуудал хурцаар тавигдаж байна. 2013 оны долдугаар сард цагдаа нар 20 мянган тонн муудсан тахианы махыг хөлдөөн зарж байсныг хураан авчээ. Мөн хархны махыг хонины махтай хольж зарсан жигшүүрт хэрэг гарсан билээ.