АНУ-ын Ерөнхийлөгч Барак Обама Иракын нийслэл Багдад руу 350 цэрэг нэмж илгээлээ. Энэ нь тус хотод байгаа Америкийн дипломатууд болон албан хаагчдыг хамгаалах зорилготой байна. Барак Обама энэхүү шийдвэрийг Иракд хэт даврагч исламын цэргийн “Исламын улс” бүлэглэл Америкийн хоёр дахь сэтгүүлчийг цаазаар авснаас хойш хэдхэн цагийн дараа гаргажээ.

Исламын улс бүлэглэл нь Ирак болон Сирийн зарим нутгийг хяналтандаа авсан бөгөөд Халифын вант улсыг дахин сэргээх зорилготой хэт даврагсад юм. Тэд Багдадын хойд хэсгийн суннистуудыг хядсан бөгөөд дараа нь христ болон язиди шашинтнуудын нутгийг хэсэгчлэн эзлээд байна.

“Бид Исламын улс бүлэглэлийн халдлагаас хамгаалж Иракт оршин суугаа дипломатуудаа хамгаалахын тулд Засгийн газрын дэмжлэгээ үргэлжлүүлсээр байх болно” хэмээн Цагаан ордон мэдэгджээ.
Ерөнхийлөгч Барак Обама Уэльсэд болох НАТО-гийн хуралд оролцохоор яваа бөгөөд Исламын улсын эсрэг олон улсын дорвитой арга хэмжээ авах асуудлыг тэнд хэлэлцэхээ онцолсон байна.