ОХУ-ын Ерөнхийлөгч Владимир Путин Зүүн Украйны байдлыг тогтворжуулах долоон шаардлага бүхий төлөвлөгөөг санал болгожээ. Хэрвээ эдгээр алхмуудыг биелүүлэх юм бол тус бүс нутаг дахь байлдааны үйл ажиллагааг зогсоох аж.

В.Путин сэтгүүлчдэд мэдэгдэхдээ “Би энэ төлөвлөгөөг Благовесченскээс Монголын нийслэл Улаабаатар луу нисэх замдаа гаргасан юм. Санаандаа орсон алхмуудаа гараар бичиж тэмдэглэсэн” хэмээн хэлсэн байна.

Гал зогсоох төлөвлөгөөний 7 шаардлага нь:
1. Орон нутгийн хамгаалах хүчин Донетск болон Луганскийн бүс нутагт цэргийн үйл ажиллагаагаа зогсоох.
2. Киевийн дэмжигчид цэргийн хүчээ буцааж татах. Мөн үүнийгээ хэлэлцээрээр баталгаажуулах.
3. Гал зогсоохын тулд олон улсын үнэн зөв, бүрэн дүүрэн хяналтыг эвлэрлийн тохиролцооны ажиглалтад хийх.
4. Энгийн иргэд болон тосгодын эсрэг байлдааны онгоц ашиглахаа зогсоох.
5. Олзлогсод болон хоригдлуудыг “бүгдийг бүгдээр” нөхцөлөөр буюу нэмэлт нөхцөлгүйгээр солилцох.
6. Донетск болон Луганскийн бүс нутаг дахь дүрвэгсдэд хүмүүнлэгийн тусламж үзүүлэх.
7. Эвдэрч сүйдсэн нийгмийн болон зорчих тээврийн дэд бүтцийг нэмэлт тусламжтайгаар шууд засварлах, сэргээх гэжээ.

Мөн тэрээр Украйны удирдагчид энэхүү саналыг нь дэмжинэ гэж итгэж байгаагаа илэрхийлсэн банйа. Зүүн Украйнд өнгөрсөн дөрөвдүгээр сард байлдааны үйл ажиллагаа эхэлснээс хойш 2593 хүн амиа алдаад байна гэж НҮБ өнгөрсөн долоо хоногт мэдээлсэн билээ.

Д.Идэр