БНХАУ-ын бизнесийн томоохон веб сайтын удирдах албан тушаалтнуудыг компаниудаас мөнгө сүрдүүлж авсан хэмээн баривчилсан тухай “Сяьнхуа” агентлаг мэдээллээ.

“21-р зуун” санхүүгийн мэдээллийн веб сайтын найман албан хаагч болон пиарын фирмүүдийн хүмүүсийг шалгах ажиллагаа үргэлжилж байна. Тус веб сайт нь “21-р зуун” группд харьяалагдаг бөгөөд “21st Century Business Herald” сониныг эзэмшдэг аж. Харин тус группыг “Guangdong Nanfang Media” компани эзэмшдэг бөгөөд энэ нь Гуандон мужийн тамгын газрын мэдлийнх гэлээ.

Веб сайтын ахлах редактор Лиу овогт, орлогч редактор Зоу овогт нар пиарын чиглэлээр үйл ажиллагаа явуулдаг хоёр фирмтэй хамтран авлига авсан хэмээн сэжиглэж байгаа юм. Тэд олон компаниудыг нэр хүндийг нь унагаана хэмээн сүрдүүлж мөнгө аваад оронд нь зар сурталчилгааг түгээх гэрээ хийж байсан аж.

БНХАУ-ын Ерөнхийлөгч Ши Жинпин авлигатай тэмцэж улс орноо хөгжүүлэх томоохон зорилго тавин ажиллаж байгаа юм. Энэхүү бодлогыг хэвлэл мэдээлэл, улс төрийн салбарт өргөн хүрээнд хэрэгжүүлж байна. Өнгөрсөн сард л гэхэд CCTV-ийн нэр хүндтэй сэтгүүлчийг авлигын хэргээр баривчилсан юм. Мөн Аюулгүйн албаны дарга асан Жоу Юнканыг ийм шалтгаанаар баривчилсан нь шуугиан тарьсан билээ.