Их Британид бэлэн тамхийг электрон тамхиар оруулах нь 50 мянга гаруй хүний амийг аварч болно гэж мэргэжилтнүүд зарлалаа. Тэд электрон тамхийг хориглох Дэлхийн Эрүүл мэндийн байгууллагын зөвлөмжийг сайшаахгүй байгаагаа илэрхийлсэн байна.

“London University” коллежийн профессор Роберт Уэст болон доктор Жэйми Браун нар энэхүү судалгааг гаргажээ. Тэд Их Британид жилд бэлэн тамхинаас гараад электрон тамхи татдаг болсон нэг сая тамхичин тутмын 6000 нь тамхинаас үүдэх үхлээс аврагдаж байгааг тогтоосон байна. Хэрвээ бүх есөн сая тамхичин электрон тамхи хэрэглэдэг болвол жилд 54 мянган хүний амийг аварч болно хэмээн судлаачид мэдэгдлээ.

Тэд хэвлэлд ярихдаа “ДЭМБ электрон тамхийг урт хугацаанд хэрэглэснээр хүний биед гарах өөрчлөлтийг тогтоогоогүй байхад хэрэглэхийг хориглох нь буруу юм. Электрон тамхи нь дэлхий даяар жилд зургаан сая хүний амийг авч буй бэлэн тамхинаас илүү аюулгүй гэдгийг л бид мэдэж байна” гэжээ.
 
Өнгөрсөн долоо хоногт ДЭМБ электрон тамхийг хориглох зөвлөмж гаргаж, засгийн газруудад тус тамхийг сурталчлах, дотооддоо хэрэглэхийг хориглосон захирамж гаргахыг уриалсан билээ. Энэ нь залуучууд электрон тамхийг хэрэглэж сураад дараа нь бэлэн тамхи татдаг болох магадлалтай гэж үзсэний улмаас ийм шийдвэр гаргасан юм.