Өчигдөр Сомалийн Засгийн газар хуралдаж Үндэсний аюулгүй байдлын албаны даргаа сольсон байна. Мөн исламын цэргийн бүлэглэл Аль-Шабаабын халдлагад цохилт өгөхөд бэлдэж эхэлжээ.

Сомалид туслах АНУ-ын цэргийн хүчнийхэн өнгөрсөн долоо хоногт агаарын дайралт хийснээр Аль-Шабааб бүлэглэлийн толгойлогч Ахмед Годанег хөнөөсөн юм. Харин өнгөрсөн бямба гарагт Аль-Шабааб шинэ толгойлогчоор Шэйх Ахмад Умар Абу Убайдахыг сонгосоноо мэдэгдэж, Ахмед Годанегийн өшөөг удахгүй авна хэмээн заналхийлсэн байна.

Энэхүү мэдэгдлийн маргааш засгийн газар яаралтай хуралдсан бөгөөд Үндэсний аюулгүйн албаны дарга Абдуллахи Мохамед Алиг албанаас нь татан буулгажээ. Засгийн газрын хэвлэлийн төлөөлөгч Ридван Абдивели өөрчлөлтийн шалтгааныг тайлбарлахаас татгалзсан ч Алиг албандаа орлогчийн эрх мэдэлтэй үлдсэн гэв. Мөн батлан хамгаалахын болон аюулгүй байдлын сайд нарыг өшөө авалтын бай болж магадгүй тул сонор сэрэмжтэй байхыг шаардаж байгаа гэсэн байна. 

Аюулгүйн албаны шинэ сайд генерал Халиф Ахмед Эрег тус улсын засгийн газар эмнэлэг, сургуулиуд дээр гарч болзошгүй халдлагад бэлтгэлтэй байгаа хэмээн өчигдөр мэдэгджээ.

Сомалийн зарим газар нутгийг эзлэн авсан Аль-Шабааб бүлэглэл нь алан хядах Аль-Кайда бүлгийн хамсаатан бөгөөд засгийн эрхийг авахыг шаардаж удаа дараалан халдлага үйлдэж байгаа юм.