ОХУ-ын Ерөнхий сайд Дмитрий Медведев барууныхны хоригийн эсрэг мэдэгдэл хийлээ. Тэрээр Москва барууныхны ямар ч шинэ хоригт адил хэмжээний хариу өгөх болно гэсэн байна. Энэ нь ОХУ-ын агаарын замаар нисэхэд болон санхүүгийн хориг тавихаас урьдчилан сэргийлж буй арга хэмжээ юм хэмээн ажиглагчид тэмдэглэж байна. Дмитрий Медведев “Ведмости” сонинд өгсөн ярилцлагадаа “Хэрвээ эрчим хүч болон санхүүгийн салбарт ямар нэгэн шинэ хориг тавих юм бол бид тэгш хэмтэй хариу барих болно” хэмээн хэлжээ.

Өчигдөр Европийн холбоо ОХУ-ын Төрийн өмчит батлан хамгаалах болон эрчим хүчний салбарын хэд хэдэн компаниудын Европийн хөрөнгийн зах зээл дээрхи арилжааг 30 хоног зогсоохоо мэдэгдсэн билээ. Тухайлбал ОХУ-ын Төрийн өмчит “Gazprom”, “Gazpromneft”, “Transneft”, “Rosneft” компани болон “Sberbank”, “VTB Bank” тэргүүтэй таван банк нэмэлт хоригт багтсан.

Гал зогсоох хэлэлцээр бүрэн хүчин төгөлдөр бөгөөд талууд улс төрийн шийдэл олсон нөхцөлд хоригийг цуцалж болно хэмээн Европийн холбоо мэдэгдээд байгаа. Харин ОХУ-ын зүгээс талууд гал зогсоох хэлэлцээрт тавигдсан шаардлагын дагуу ажиллаж зэвсэгт мөргөлдөөн гаргахгүй байхыг Украйнаас шаардаж байгаа юм.

Өнгөрсөн баасан гарагт Украйн, ОХУ-ын төлөөлөгчид, салан тусгаарлагчдын удирдагчид болон Европийн Аюулгүй байдал, хамтын ажиллагааны байгууллагын төлөөлөгч нар гал зогсоох хэлэлцээрийг баталсан ч зэвсэгт мөргөлдөөн хоёр ч удаа гарсан нь хэлэлцээрийг үнэгүйдүүлж байна.