Өнгөрсөн долдугаар сард зүүн Украйны нутагт унаж олон зуун хүний амийг авсан Малайзын МH17 нисэх онгоц яагаад осолдсон тухай Голландын шинжээчид мэдээлэл хийлээ. Голландын Аюулгүйн зөвлөлийн шинжээчдийн мэдээлснээр онгоц техникийн болон нислэгт явсан хүний буруутай үйл ажиллагаанаас болж осолдоогүй гэлээ. Учир нь онгоц сөнөхөөс өмнө ямар ч тусламжийн дуудлага хийгээгүй болох нь тогтоогджээ.

Мэргэжилтнүүд онгоцны хар хайрцагт бичигдсэн мэдээлэл, агаарын замын хяналтын мэдээлэл, сансрын хиймэл дагуулын зураг, хэргийн газраас авсан зургуудад шинжилгээ хийж ийм дүгнэлт гаргасан байна.

Харин МН17 онгоцыг өндөр хурдтай олон тооны объектод цохигдсон байж болзошгүй хэмээн сэжиглэсэн дүгнэлт хийжээ. Ослын ул мөр BUK пуужингийн системийн бай ямар болдогтой төстэй байгаа тул ийм пуужингаар харвасан байж болзошгүй гэсэн байна. Тиймээс энд хэн пуужин харвав гэсэн өнөөх маргаант асуулт дахин гарч ирж байгаа тул Голландын шинжээчид олон улсыг уг шинжилгээнд хамтран ажиллахыг хүссэн байна.
Амстердамаас Куала Лумпур орохоор нисч явсон онгоц зүүн Украйны нутагт осолдсоноор 298 хүн амиа алдсан билээ.