“Apple” компани өчигдөр Калифорнийн Купертино хотод шинэ ухаалаг цагаа танилцуулж ихээхэн шуугиан тарьлаа. Тус компаниас анх удаа гаргаж буй өмсөж болохуйц төхөөрөмжийн тухай сарын өмнөөс яригдаж, нээлтээ хийхийг нь тэсэн ядан хүлээсэн хэрэглэгч олон байсан юм.

Ухаалаг цаг Apple Watch нь дэлгэц мэдрэгчтэй боловч заримдаа даралтын хүч илрүүлдэг байна. “Apple” компани өөрсдийн шинэ бүтээгдэхүүнээ “дасгал сургуулилтад бүрэн дүүрэн зориулагдсан төхөөрөмж” хэмээн онцолж байгаа юм. Үүнээс гадна iPhone 5, 5s, 5c болон iPhone 6 загваруудтай л хослон ажиллах механизмтай аж.

Цагны нүүр индранилаар хийгдсэнийг давуу тал хэмээн тайлбарлаж байна. Энэ нь зурагдаж, халцрахаас хамгаалагдаг материал бөгөөд iPhone гар утаснуудын дэлгэцэнд ашигладаг горилла шилнээс илүү бөт бөх байдаг байна.

Ухаалаг цагийг хоёр хэмжээ, гурван янзын загвараас сонгож болно. Apple Watch (ган), Apple Watch Sport (хөнгөн цагаан) болон Apple Watch Edition (18 каратын алт)-аар хийгдсэн загварууд ирэх жилийн эхээр худалдаанд гарах бөгөөд үнэ нь 349 ам.доллараас эхлэх аж.

Цаг эрүүл мэнд, фитнесст ач холбогдол өгсөн тул зүрхний цохилт, дасгал хөдөлгөөн, явсан зай, зарцуулсан калори зэргийн хэмжээг үзүүлдэг гэлээ. Мөн зөвхөн энэ төхөөрөмжинд зориулсан олон тооны аппликэйшнтэйг онцолсон байна. Тухайлбал, хүмүүст хамгийн ихээр яригдаж буй чадвар нь Apple Watch хэрэглэдэг өөр нэг хүн хажууд нь байх юм бол хэрэглэгчийн зүрхний цохилтыг найзад нь дамжуулдаг байна.

Мэдээж энэхүү цаг нь орон нутгийн киноны жагсаалт, хувийн төлөвлөгөө, хөгжим сонсох зэргийг хялбархан зохион байгуулна хэмээн мэдэгджээ.

2011 онд Apple компанийг үүсгэн байгуулагч Стив Жобс таалал төгссөнөөс хойш энэ жил анх удаа цоо шинэ төрлийн бүтээгдэхүүн танилцуулна хэмээн амласан Гүйцэтгэх захирал Тим Күүкийн амлалт ийнхүү амжилттай биеллээ хэмээн барууны хэвлэлүүд бичжээ.