“Apple” компани өчигдөр АНУ-ын Калифорн мужийн Купертино хотод шинэ бүтээгдэхүүнүүдээ танилцууллаа. Энэхүү арга хэмжээнд ухаалаг цагнаас гадна iPhone утасны хоёр шинэ загварыг танилцуулжээ.

iPhone 6 болон iPhone 6 Plus утаснууд өмнөх загваруудаас харьцангуй том дэлгэцтэй аж. iPhone 6 утас 4.7 инч (11.9cm)-ийн дэлгэцтэй бол iPhone 6 Plus 5.5 инч (14.0cm)-ийн дэлгэцтэй байна. Мөн шинэ утаснуудад А8 чип суулгаж өгсөн бөгөөд энэ нь өмнөх загваруудаас 25 хувиар хурдан тооцоолох чадвартайг онцолсон байна.

Шинэ загваруудад ретина HD дэлгэцийг сайжруулж хийсэн бөгөөд энэ нь iPhone 6 инч тутуамд 326 пиксель, iPhone 6 Plus 401 пиксель нягтралыг бий болгож чадах аж. Гэвч энэхүү үзүүлэлт нь”Самсунг” компанийн Galaxy S5, Galaxy Note 4 болон HTC One утаснуудын нягтралыг гүйцэхгүй байгаа юм.

iPhone 6 болон iPhone 6 Plus утаснуудын урьдчилсан захиалгыг энэ сарын 12-ны өдрөөс эхлэн авах бөгөөд 19-ны өдрөөс захиалсан утас эздийнхээ гарт очих юм байна. Харин 2015 оны эхээр дэлхийн 115 улсад нээлттэй худалдаалж эхлэх аж.
 
Шинэ загварууад iPhone 5S-ийн адил саарал, алтлаг, мөнгөлөг гурван сонголттой байна. Хоёр жилийн гэрээ хийсэн хэрэглэгчиддээ iPhone 6 утасны 6GB багтаамжтайг 199 доллар, 64GB багтаамжтайг 299 доллараар, 128GB багтаамжтайг 399 доллараар худалдаалах аж. Харин iPhone 6 Plus-ийн 16 GB багтаамжтай нв 299 доллараас эхэлж байна.

Мөн энэхүү арга хэмжээний үеэр Apple Pay шинэ үйлчилгээг танилцуулсан бөгөөд энэ нь таны хэтэвчийг орлох болно хэмээн гүйцэтгэх захирал Тим Күүк онцолжээ.

“Apple” компанийг 2013 болон 2014 оны эхний улиралд ухаалаг гар утасны худалдаа нь 13-аас 11.7 хувь болтлоо буурсан хэмээн мэдээлж байсан. Тиймээс илүү том дэлгэц бүхий шинэ загвар худалдаанд гаргаж байгаа нь худалдан авагчдыг эргүүлэн олох зорилготой хэмээн салбарын мэргэжилтнүүд үзэж байна.