АНУ-ын Ерөнхийлөгч Барак Обама алан хядах Исламын Улс (ИУ) бүлэглэлтэй тэмцэхэд ерөнхийлөгчийн бүрэн эрхээ ашиглана хэмээн Цагаан ордон мэдээллээ. Тэрээр Ирак болон Сири дэх ИУ-ынхантай тэмцэхдээ Конгрессоос зөвшөөрөл авалгүйгээр цэргийн ажиллагаа хийнэ гэжээ.
 
Цагаан ордны мэдээлснээр Обама ИУ-тай тэмцэх төлөвлөгөөгөө өчигдөр Конгрессын удирдагчидтай зөвлөлдсөн бөгөөд уг уулзалт үр дүнтэй болсон гэлээ. Тэрээр түүний төлөвлөгөөг дэмжихийг хүссэн ч Конгрессоос зөвшөөрөл хүсэхгүйгээр хэрэгжүүлэх бүрэн эрхтэй гэдгээ сануулсан байна.

Барак Обама жилийн өмнө Сирийн эсрэг агаарын дайралт хийх төлөвлөгөө боловсруулсан ч Конгрессын лидерүүд зөвшөөрөөгүй билээ.

Барак Обама орон нутгийн цагаар лхагва гаргийн 21:00 цагт ИУ-тай тэмцэх төлөвлөгөөгөө ард иргэддээ танилцуулах юм. Сүүлийн саруудад Сири, Иракт өргөн нутгийг хяналтандаа авсан Исламын Улс бүлэглэл Халифын вант улс байгуулах зорилготой бөгөөд олон зуун хүнийг барьцаалан хөнөөсний дотор Америкийн хоёр сэтгүүлч цаазаар авахуулсан юм.

“Вашингтон пост” болон “АBC” телевизийн хамтарсан судалгаагаар Америкийн иргэдийн дийлэнх нь Исламын улсыг АНУ-д аюултай хэмээн үзсэн бөгөөд Ирак болон Сирид агаарын дайралт хийхийг дэмжсэн байна.