Афганистаны Ерөнхийлөгч Хамид Карзайн албанаас АНУ-ыг тус улсын энгийн иргэдийг хөнөөж байна хэмээн буруутгалаа. Хэвлэлийн төлөөлөгч Абдул Гани Мусамемийн мэдээлснээр мягмар гарагт АНУ-ын Кунар мужид хийсэн агаарын дайралтад 14 энгийн иргэн амиа алдаж, 13 хүн гэмтэж бэртсэн байна. Харин лхагва гаргийн агаарын дайралтын үр дүнд 11 энгийн иргэн амиа алдсаны дотор хоёр хүүхэд байсан гэлээ. Мөн 12 хүн гэмтэж бэртжээ.

АНУ-аар удирдуулсан цэргийн холбоо Афганистан дахь Талибанчуудтай 13 дах жилдээ тэмцэж байгаа хэдий ч ажиллагааны үеэр олон энгийн иргэн амиа алдаж байгаад эрх баригчид дургүйцлээ илэрхийлдэг байна. АНУ-ын зүгээс цэргийн ажиллагаагаа ирэх 12-р сараас зогсоохоор шийдсэн юм.

“Агаарын дэмжлэг нэртэй гадны хүчнийхны бөмбөгдөлтөнд олон энгийн иргэд, цэргийн албан хаагчид амиа алдаж байна. Бид ийм тохиолдлуудыг мөрдөж байгаа” хэмээн Кунар мужийн цагдаагийн албаны дарга Абдул Хади Саедхил мэдэгджээ.

НАТО-гийн Олон улсын аюулгүйн тусламжийн хүч ажиллагааны үеэр энгийн иргэдийг бэртээхгүй байх нь нэн тэргүүний зорилт хэмээн мэдээлдэг ч одоогоор болсон хэрэг явдалд ямар нэгэн хариу хэлээгүй байна.