Өөрсдийгөө “Алжир дахь Халифын цэргүүд” хэмээн нэрлэх зэвсэглэсэн бүлэг этгээдүүд Аль-Кайда бүлэглэлийн хойд Африкын салбараас салж Исламын улс бүлэглэлтэй нэгдэхээр замдаа гарсан тухай “Ройтерс” агентлаг мэдээллээ. Тэд Ирак, Сирид АНУ-ын агаарын цохилтод хариу өгөхөөр бэлдэж буй “Исламын улс” алан хядах бүлэглэлтэй нэгдэж тулалдах аж.

Өчигдөр Аль-Кайда бүлэглэлийн баруун хойд Африкын далайн болон уулын бүсийг хариуцсан коммандлагч Гоури Абделмалек мэдээлэл хийж өөрийн мэдлийн хүмүүсээ бүлэглэлээс авч явж буйгаа зарласан байна. Тэд Аль-Кайда бүлэглэлээсээ урваж буй шалтгаанаа үнэнээс хазайж байгаа тул салан тусгаарлалаа хэмээн тайлбарлажээ.

Дайн мөргөлдөөний үеэр Халед Абу Сулэймань хэмээн нэрлэгддэг тэрээр Исламын улсын тэргүүлэгчдэд хандан “Та нарт хойд Африкын далайн болон уулын бүсийн исламын цэргүүдийг авчирлаа. Хэрвээ үүрэг өгөх л юм бол тэд биелүүлэх болно” хэмээн мэдэгджээ.
Одоогийн байдлаар Исламын улсад нэгдэж буй Аль-Кайдачуудын тоо тодорхойгүй байгаа бөгөөд Алжирын эрх баригчид энэхүү мэдээлэлд ямар нэгэн хариу үйлдэл үзүүлээгүй байна.

Д.Идэр