Английн парламентын гурван гол намын удирдагчид Шотландыг тусгаар тогтнолоосоо татгалзвал илүү их эрх мэдлийг олгоно хэмээн амлалт өглөө. Их Британы үндэсний хамгийн том сонингуудын нэг “Daily Record” сонины эхний нүүрэнд тэдний амлалт нийтлэгдсэн бөгөөд Ерөнхий сайд Дэвид Камерон болон Хөдөлмөрийн намын дарга Эд Милибанд, Дэд Ерөнхий сайд Ник Клегг нар гарын үсэг зурж баталгаажуулсан байв.

Амлалт гурван хэсэгтэй бөгөөд Барнеттын санхүүжүүлэлтийн загварыг хадгалахыг хичээсэн байв. Харин Шотландын тусгаар тогтнолын дэмжигч “YES” кампанит ажлынхан илүү эрх мэдэл олгох ганцхан батлан даалт бол тусгаар тогтнолд тийм гэж хэлэх шалтгаан хэмээн буруутгажээ.

Зөвшилцөл санал болгож буй амлалтын эхний хэсэг нь Шотландын парламентад их хэмжээний шинэ эрх мэдэл олгох бөгөөд гурван нам хуваарийн дагуу үүнийг биелүүлнэ гэсэн байв. Хоёр дахь хэсэг нь удирдагчид Их Британы боломж болон аюулгүй байдлыг баталгаажуулахын тулд нөөц баялагаа тэнцүү хуваалцана гэжээ. Харин гуравдугаарт үндэсний эрүүл мэндийн үйлчилгээний санхүүжилтийг Шотландын засгийн газарт Барнеттын бүтцийн дагуу хуваарилах гэсэн байна. 

Барнеттын томъёолол гэдэг нь Их Британи даяар олон нийтийн үйлчилгээнд төсвийг зарцуулахад ашигладаг арга юм.

Дэвид Камерон телевизэд өгсөн мэдэгдэлдээ “Би кампанит ажлаа эхлэхээсээ л үүнийг ярьсан. Хэрвээ Шотланд салан тусгаарлахад ҮГҮЙ гэж хэлбэл Их Британы үлдсэн хэсэг тэдэнд эрх мэдэл шилжүүлэхэд ТИЙМ гэж хэлэх болно” гэжээ. Энэхүү амлалтыг Ерөнхий сайд асан Гордон Браун ч мөн дэмжиж буйгаа илэрхийлжээ.