Хонконгийн “Төвийг эзэл” хэмээх ардчиллыг дэмжигч хөдөлгөөнийхөн хүлцэнгүй бус байх компанит ажил өрнүүллээ. Засгийн газрын төв байрны гадна олон мянган хүн цугларчээ. Өчигдөр эрх баригчид хориотой бүсэд нэвтэрсэн гэдэг үндэслэлээр 60 гаруй жагсагчийг саатуулсан юм. Энэ хооронд жагсагчдын цугларсан газар цагдаа нар зогсож, замын хөдөлгөөнийг хаажээ. Цагдаа нар нулимс асгаруулах хий ашиглан жагсаалыг тарааж болзошгүй тул тэмцэгчид нүдний хамгаалалт, нөмрөг өмсчээ.
Тэд бүх нийтийг оролцуулсан, ардчилсан сонгууль явуулахыг уриалан тэмцэж байна. Хятадын Засгийн газар 2017 он гэхэд Хонконгийн удирдагчийг шууд сонгуулиар тодруулдаг болно гэдгээ амласан юм. Гэвч нэр дэвшүүлэх хорооноос сонгогдсон хоёроос гурван төлөөлөгчөөс сонголтоо хийхээр болсон нь амлалтаа биелүүлээгүй хэрэг гэж ардчилагчид үзэж байна. Тиймээс тэмцэгчид Хонконгийн сонгогчдын сайшаагаагүй нэр дэвшигчийг жагсаалтаас хасдаг байхыг Хятадын талаас шаардав.
Энэ хооронд Бээжингийн талыг дэмжигчид жагсаал цуглаан нь Хонконгийн энх тайван, тогтвортой байдалд саад хийнэ гэж үзэж байна. 1997 онд Хятад Хонконгийг Их Британиас буцаан авахдаа чөлөөт, ардчилсан системийг хэвээр үлдэнэ хэмээн амласан ч амлалтаа биелүүлээгүй гэж эсэргүүцэгчид Бээжинг буруутгасаар байна. Харин Бээжин эх газарт улс төрийн шинэчлэл хийхийн эсрэг хатуу зогссон хэвээр байгаа бөгөөд өөрсдийг нь чиглэх шүүмжлэлийг өдөөх хүсэлгүй байна гэж BBC-гийн Хятад дахь сэтгүүлч Кэрри Грэйси онцолжээ.
