Одоогоос 12 жилийн өмнө АНУ Иракыг цөмийн зэвсэг нуусан гэх шалтигаар буруутган газар нутагруу нь довтолж дайныг эхлүүлж байлаа.  Иракын дайны мэдээлэл тэр дороо дэлхийн нийтийн анхаарлын төвд орсон. Тухайн үеийн Иракын удирдагч асан Саддам Хусейн ард түмэндээ хандаж  “Эрхэм ахан дүүсээ! Одоогоос 800 жилийн өмнө Монголын эзлэн түрэмгийлэгчид Багдадруу довтолж байлаа. Харин одоо түүхэндээ хоёр дахь удаагаа Багдадруу харийн түрэмгийлэгч довтолж байна” гэж үг хэлсэн байдаг. Энэхүү мэдэгдэл мөн л олон улсын хэвлэл мэдээллийн анхаарлыг тойроогүй ч Монголчууд төдийлөн сонсож амжаагүй.

    Хүн төрөлхтөний түүхэнд өөрийн гэсэн ул мөрөө үлдээж аугаа эзэнт гүрнийг байгуулж байсан Монголчуудыг дэлхийн олон үндэстнүүд сайн, муу янз бүрээр дүгнэдэг. Цаг үе нээлттэй болж соёлжихын хэрээр Монголчуудын хүн төрөлхтөний түүхэнд үзүүлсэн гавьяа, оруулсан хувь нэмрийг бодитойгоор үнэлэх хандлага хүчээ авч байна. 20-р зууныг хүртэл Европ, Араб, Орос, Хятад гээд томоохон үндэстнүүдийн түүхэнд Монголчуудыг хүний махаар хооллодог араатан мэтээр бичиж, эзэнт гүрний үеийг түрэмгийлэл, харгислалаар дүүрэн байсан гэх мэтээр сурталддаг.

    Харин Монголчууд орчин үеийн цаасан мөнгийг ашигладаг, чөлөөт худалдаа тогтолцоотой, бүх шашныг ижил тэгш авч үздэг, мэдээллийн сүлжээтэй, хуулийн засаглалтай, хүчирхэг армитай улсыг байгуулж орчин үеийн даяаршлын үндсэн суурийг тавьсан нь маргаангүй үнэн. Түүхийн энэхүү үнэнийг 20-р зуунд өндөр хөгжил дэвшлийг олсон улс орнууд хүлээн зөвшөөрч, Монголын түүхэнд хүндэтгэлэй, эрүүлээр ханддаг болж байгаа нь сайшаалтай.

    Гэвч Монголчуудыг “Араатан” гэж дүрсэлдэн сурталддаг хоцрогдсон сэтгэлгээтэй улс үндэстнүүд өнөөг хүртэл бий.  Зүүн Европын зарим үндэстнүүд үр хүүхдээ айлгахдаа “Монголчуудад өгнө шүү” /Манай ойлголтоор бол хадны мангаа  бололтой/ гэж хэлдэг хэлцтэй. Тэдний гол төлөөлөл бол Украйнчууд юм.

    Саявтар Украйны “Тиждень” хэмээх томоохон сэтгүүлд В.Путиныг Монгол хааны дүрээр дүрсэлж ковер зураг хийсэн нь багагүй шуугианыг дэгдээгээд байна. Тэд “Монголын эзлэн түрэмгийллийг өв залгамжлагч бол Оросууд” гэсэн санаагаар энэхүү дүрслэлийг бий болгосон нь зорилгоо тун сайн биелүүлж байгаа гэнэ. Тус сэтгүүлд "Бид Орос, Хятад нь Монголын эзлэн түрэмгийллийн хамгийн том залгамжлагчид гэдгийг мэднэ. Дөрөвдүгээр Иван нь Монголын нэрт цэргийн удирдагч Мамай буюу Цагаан хааны үр хойч байжээ. Оросын Цари нар өөрсдийгөө латин хэлээр "Цагаан хаан" гэж нэрлэдэг хэмээн бичсэн байна.

Ийнхүү Украйнчууд өөрийн улсынх нь тусгаар тогтнол, бүрэн бүтэн байдалд хамгийн ихээр аюул занал учруулж байгаа дайсан этгээдээ ард түмнийхээ хамгийн ихээр жигшин хүлээж авдаг Монголчуудын түрэмгийлэлтэй ийнхүү зүйрлэж байна. Энэ нь нэг талаасаа манай эзэнт гүрний түүхэн ул мөр өнөөг хүртэл арилашгүй байгаагийн илэрхийлэл боловч мөнөөх л Монголчууд зэрлэг балмад гэсэн харанхуй буруу ойлголтоосоо салаагүй байгаагийн шинж билээ.