Бусдад туслахын тулд заавал баян байх шаардлагагүй. “Haven Night Shelter Welfare” хэмээх байгууллагаас зохион байгуулсан хөтөлбөр олон хүний сэтгэлд үлдсэн юм. Тус байгууллага Өмнөд Африкийн Кейптаун хотын гудамж, талбайд ил задгай хувцас дэлгэн тавьж, орон гэргүй хүмүүст хандивлах аян өрнүүлжээ. Энэхүү аянд хүмүүс сайн дураараа нэгдэж, өөрт хэрэггүй болсон, өмсдөггүй хувцаснуудаа бэлэглэж байлаа.

Хятадын саятан Сюн Шуихуа төрж өссөн тосгоныхоо хуучин модон байшингуудыг нурааж, эвдэрсэн замуудыг нь засч, нийт 6,4 сая доллараар 72 айлд тансаг хаус бэлэглэжээ. 54 настай бизнесмэн ган үйлдвэрлэлийн салбараас нилээд ашиг олж, түүгээрээ хүмүүсийг баярлуулах сайн дурын үйлс хийхийг хүссэн гэнэ. “Би одоо хүссэн бүхнээ хийж чадах мөнгөтэй болсон. Хүн үндэс угсаа, нутгаа мартаж болохгүй. Хүүхэд байхад минь надад тусалсан хүмүүсийн өрийг ингэж ч болтугай өгч байна. 75 настай Цион Чу гуай гэхэд намайг бага байхад хүн бүрт тусалсан сайн хүн байлаа” гэж Сюн бизнесмэн ярьжээ.

Жинхэнэ баатар гэж 34 настай Нараянан Кришнаныг хэлэх байх. Тэрээр сүүлийн 12 жил Энэтхэг даяар аялж гэр бүлээсээ салж хагацсан, өвчинд нэрвэгдэн гудамжинд тэнүүчлэн амьдарч буй хүмүүст 1,5 сая удаа хоол өгсөн эгэл гавъяатан юм. 2002 онд залуу Нараянан Кришнан алдартай рестораны өндөр зэрэглэлийн тогоочоор ажиллаж шагнал хүртэж байсан гэдэг. Мөн хувийн тансаг зочид буудалтай байв. Эцэст нь амжилт, нэр хүнд дагуулсан тогоочийн ажлаа орхиж бүх амьдралаа хүмүүст туслахад зориулж байна. Ингээд баячуудад тансаг хоол хийхээс илүүтэй тусламж шаардлагатай байгаа тэр бүлэгт зориулан ажлаа хийх болсон юм. Бүх хөрөнгөө ядуусыг хооллоход зарцуулсаар хувийн бизнесээ алдаж, эцэст нь өвөг эцгээс уламжилж ирсэн байшингаа зарсан байна. Кришняан 2010 онд CNN агентлагийн эгэл баатруудын тоонд багтаж байв.

АНУ-ын Коннектикут мужийн Хартфорд хотын оршин суугч Энтони Симерис үсчин Жое гэдэг нэрээрээ алдаршчээ. Тэрбээр 25 жилийн турш тэнэмэл хүмүүсийн үсийг үнэгүй засч өгөн чин сэтгэлээсээ тэвэрч байна. 82 настай энэ ахмад буурал тэнэмэл хүмүүсийн үсийг засч, сахлыг нь авч, нүүрэнд нь массаж хийхийн тулд бүтэн өдөржингөө наранд гандаж зогсдог юм.


2013 онд Атлана хотын иргэд болох Вилли ба Карол Фаулер нар охин Тамарагийнхаа хуримыг нижгэр тэмдэглэхээр төлөвлөж байлаа. Гэвч Тамара ёслол эхлэхээс 40 хоногийн өмнө хуримаа цуцалсанаар бүх зүйл орвонгоороо эргэсэн юм. Тиймээс Фаулер 200 гаруй тэнэмэл хүмүүсийг цуглуулан хоолложээ. Үүнээс хойш энэхүү сайн дурын арга хэмжээг бизнес эрхлэгчдийн дэмжлэгтэйгээр жил бүр зохион байгуулдаг болсон байна.



Бразилын Сао Пауло хотын иргэн Робсон Мендонкагийн улаан унадаг дугуй энгийн мэт харагдах боловч ер бусын хэрэгсэл юм. Тэрээр энэхүү унадаг дугуйн дээрээ 150 кг жинтэй, 300 гаруй номыг байнга тээвэрлэж явдаг ажээ. 61 настай Мендонка барилгын салбарт ажиллаж байгаад бүтэлгүйтсэний улмаас арван жил гудамжинд амьдарчээ. Тиймээс хүмүүст туслахын ач холбогдлыг сайтар ойлгож авсан байна. Мендонка 30 мянган номыг бусдад үнэгүй тараажээ.