Уг нь эвтэй байвал ирэх сонгуулиудаар ялалт байгуулах магадлал хамгийн өндөртэй улс төрийн хүчин бол АН. Эрх баригчдын эвдрэл галзуурал энэ чигээрээ үргэлжилбэл хоёр муугаас арай дээр муу нь АН болж харагдах учиртай л байгаа. Гэвч АН бол фракц байгуулж, жигүүр ургуулж эсрэг намдаа олзлогддогоороо алдартай нам. Энэ жамаараа АН-д өчигдөр нэгэн фракц мэндэллээ.

Б.Түвшин, О.Амгаланбаатар, Х.Болормаа, П.Батчимэг, Ц.Баатархүү, Д.Жаргалсайхан, А.Ганбаатар, Д.Энхтуяа, Д.Ганбат, Дав.Цогтбаатар, Г.Хосбаяр нарын УИХ-ын 11 гишүүн, ҮБХ-ны 95 гишүүнийг эгнээндээ нэгтгэсэн хэмээн мэдээлээд байгаа энэ фракцын албан ёсны нэршил нь “Ардчилсан сэргэлт” холбоо.

Албан бусаар бол нам дотроо О.Амгаланбаатарын фракцынхан хэмээн нэрлэгдээд байгаа. Нэгтгэх нийлүүлэх, холбох гол үүргийг хийсэн О.Амгаланбаатар гишүүн бол улс төрийн хүрээндээ Ерөнхийлөгч У.Хүрэлсүхийн АН дахь төлөөлөгч хэмээн нэрлэгддэг нэгэн.

Одоогоор АН-ын хамгийн отгон фракц болоод байгаа “Ардчилсан сэргэлт” холбоонд нэгдсэн 11 гишүүнийг ерөнхийдөө О.Амгаланбаатарт дагаар орсон АН дахь АПУ фракц гээд тоймлож болохоор байна. Учир нь эдгээр 11-д УИХ-дахь АПУ тамгатай гурван ч гишүүн буй юм. Бүр тодруулбал, П.Батчимэг, А.Ганбаатар, Б.Түвшин нар О.Амгаланбаатарын нэгтгэсэн энэ фракцид харьяалагдах болсныг ингээд нэрлэхэд нэг их буруудахгүй л болов уу?

А.Болдбаатар