Монгол Улсаас тэр тусмаа нийслэл Улаанбаатарын нутаг дэвсгэрээс эрэгтэй хүний занданшуулсан шарил олджээ. Шарилыг Шүүхийн шинжил­­гээний үндэсний хүрээлэнд өчигдөр 18:30 цагийн үед Цагдаагийн Ерөнхий газраас хүлээлгэн өгч, хамгаалалтад авчээ. Гэхдээ бүртгэлд Сонгинохайрхан дүүргээс хэмээсэн байгаа ч зарим эх сурвалж Баянзүрх дүүргийн нутаг дэвсгэрээс ширэнд боодолтойгоор олдсон хэмээж байгаа юм.
Муммиг хүлээлгэн өгөх үед бурханч лам Г.Пүрэвбат болон улстөрийн хүрээнийхэн очиж сонирхжээ. Анхны дүгнэлтээр бол шарилыг 200 гаруй жилийн настай хэмээн тайлбарлаж байгаа аж.

Энэ талаар цагдаагийн байгууллагын холбогдох албаныхнаас тодруулахад "Өчигдөр Сонгинохайрхан дүүргийн ёсдүгээр хороонд занданшуулсан байж болзошгүй цогцос байна гэсэн мэдээлэл ирсэн. Мэдээллийн дагуу тус дүүргийн цагдаагийн алба хаагчид очиж шалгалтын ажиллагаа хийхэд тус хороонд оршин суух 45 настай эрэгтэй Э гэгч хашаандаа тунгалаг наалдамхай хальсаар битүү ороож боосон 60х47х58см хэмжээтэй эртний хүний занданжуулсан цогцос нууж байсныг илрүүлэн Шүүхийн шинжилгээн үндэсний хүрээлэнд хүлээлгэн өгсөн. Одоо Шүүхийн шинжилгээний үндэсний хүрээлэн болон цагдаагийн байгууллагынхан хамтран тухайн цогцосыг хаанаас авчирсан гэдгийг тогтоохоор эрүүгийн хэрэг үүсгэн Сонгинохайрхан дүүргийн цагдаагийн  хоёрдугаар хэлтэст шалгаж байна" гэв.

Ямар ч байсан занданшуулсан шарил нь тухайн олдсон газраасаа бол гарч ирээгүй, зөөвөрлөж авчирсан нь урьдчилсан байдлаар тогтоогдоод байгаа аж.