Төрийн ордонд дөнгөж сая Монгол Улсын гавьяат тамирчин, мэргэжлийн сумогийн 69 дэх ёкузона Хакухо М.Даваажаргалд Монгол Улсын Ерөнхийлөгч Ц.Элбэгдорж Хөдөлмөрийн баатар хэмээх эрхэм хүндтэй цолыг гардуулан өглөө. Тэрээр ийнхүү сумогийн ертөнцөөс төрсөн хоёр дахь хөдөлмөрийн баатар болж байна.

 Хакухо өнгөрсөн сард Японы 1700 жилийн түүхтэй үндэсний спорт болох сумогийн түүхэнд нэрээ мөнхөлж, хэний ч эвдэж чадахгүй гэж байсан рекорд амжилтыг шинэчилсэн билээ. Тэрээр одоогийн байдлаар 33 түрүүлээд буй бөгөөд цаашид ч гэсэн олон арван түрүү авах боломжтой. Хакухо энэхүү түүхэн амжилтыг тогтоохын тулд ердөө наймхан жил барилдсан бол 32 түрүүлээд байсан домогт их аварга Тайхо 11 жилийг зарцуулсан байдаг. Ийнхүү "Галзууруулагч" хэмээн хонь жилийн босгон дээр Хөдөлмөрийн баатар хэмээх эрхэм хүндтэй цолоор энгэрээ мялаасан талын Монгол хүчтэн Хакухо М.Даваажаргалд халуун баяр хүргэе.