Үндэсний уран зургийн галлерей өнөөдрөөс эхлээд байгалийн үзэсгэлэнт гэрэл зургаар дүүрлээ. Үдийн 11 цаг. Галлерейн гурван давхарт шатаар өгсөн гарч ирвэл “Монголдоо сайхан аялцгаая” гэж бичсэн аав, хүү хоёрын зурагтай анонс угтав. Анонсын араас эхлээд ханаар дүүрэн нэгэн жигд хэмжээтэй зургуудыг өнгө алаглуулан өлгөсөн байна. Отгонтэнгэр хайрхан, Ихэсийн нуур, Хөвсгөл далай, Ханхөхий нуруу, Баянхайрхан уул гээд захаас аваад сайхан зургууд эхэллээ. Энэ үзэсгэлэн бол АН-ын дарга Н.Алтанхуягийнх. Үнэндээ тэр хүүтэйгээ хамтран уг үзэсгэлэнг гаргажээ. 120 зурагтай үзэсгэлэнг бие даан гаргахаар Н.Алтанхуяг дарга төлөвлөж байсан ч дундын өмчөөс үүдэж оюуны бүтээлийн асуудал гарч иржээ. Түүний хүү А.Тулга аавыгаа аялахад үргэлж хамт явдаг байсан бөгөөд дундаа нэг зургийн аппараттай байсан учраас нийт зураг нь хоёр хуваагджээ. Н.Алтанхуягийн зарим зураг, А.Тулгын дийлэнх зураг энэ үзэсгэлэнг бүрдүүлсэн байна.

    Хар өнгийн хослол, цагаан цамц, улаан зангиагаар гангарсан Ардчилсан намын дарга нийт 300 гаруй сайхан зургаасаа түүвэрлэж ирсэн гэдгээ сэтгүүлчдэд хэлж байлаа. Том цагаан танхимд тархсан хүмүүсийн дунд УИХ-ын гишүүн Кёкюүшүзан Д.Батбаяр, Л.Гансүх, АН-ын нарийн бичгийн дарга Д.Эрдэнэбат тэргүүтэй улс төрчид ирсэн байв. Мөн Н.Алтанхуягийн гэр бүл, хүүхдүүд нь ч ирсэн байсан юм.

    Төд удалгүй АН-ын дарга танхимын хойморт зассан гүн цэнхэр өнгөтэй тайзнаа нарийн хар хослол, хар зангиа, цагаан цамцтэй өндөр хүүгээ дагуулан гарч үзэсгэлэнгийнхээ түүхийг ярив. “Би өнөөдөр гэрэл зураг дардаг гэдгээ гайхуулах гэж ирээгүй. Монголынхоо сайхан үзэсгэлэнт газраар сайхан аялцгаая гэж хүмүүст уриалах гэсэн юм. Гэхдээ бид хоёр зургуудаараа эхлээд 13 зурагтай 2012 оны ханын календарь хэвлүүлсэн. Тэгээд удалгүй ердөө 13-ыг нь дэлгэж байхаар 120-ыг нээе гэж шийдсэн юм. Мэдээж хүүтэйгээ хамт авч байсан болохоор хамтарсан үзэсгэлэн гаргахаас өөр сонголт үлдээгүй. Учир нь бид хоёр дундаа нэг аппараттай байсан, харин одоо бол тэгэх шаардлагагүй болсон. Бид тус тусдаа аппараттай болоод байгаа” гэж байв.

   Танхимд цугласан хүмүүс Н.Алтанхуяг даргын үгийг чихээрээ сонсонгоо сайхан зургуудад харц унаган алгуурхан хөлөө зөөн алхацгааж байлаа. Үзэсгэлэнг хамтран гаргасан залуу хүү А.Тулга ШУТИС-д суралцдаг оюутан. Түүний хобби нь зураг авах бөгөөд аав нь энэ хоббиг нь дэмждэг учраас үзэсгэлэнгээ гаргахаар болсон гэлээ.

    Аав, хүү хоёрын үзэсгэлэнтэй зэрэгцээд тэр танхимд Финланд бүсгүй, гэрэл зурагчин Ирья Халашийн 16 жилийн хөдөлмөрийг дэлгэсэн үзэсгэлэн гарч байна. 1990-2006 оны хооронд ардчиллын гэрэл зургийг авч, Ройтерсийн Монгол дахь зурагчнаар ажилласан энэ бүсгүй 1987 оноос хойш манай улсад амьдарсан бөгөөд монголоор сайн ярьдаг. “Бид мартахгүй” хэмээх түүний үзэсгэлэн энэ сарын 15-нд нээлтээ хийх үед АН-ын дарга Н.Алтанхуяг ирж үг хэлж байжээ. Харин өнөөдөр өөрийн үзэсгэлэнгээ нээв.

    Ингээд танхим дүүргэсэн үзэгч, сэтгүүлчид байгалийн сайхныг үзүүлсэн гэрэл зургуудыг харж, хоорондоо ярилцацгааж эхэллээ. Н.Алтанхуяг өөрийн зургуудыг тайлбарлан ярьж байлаа. Хамгийн цэнгэн устай, эрүүл мэндэд тустай, эрдэс бодис элбэгтэй тийм тийм нуур тэнд тэнд байдаг хэмээн аргагүй л очиж үзсэн болохоор түгдрэлгүй ярьж байв. Түүний хувьд хамгийн их “үнэтэй”, хөдөлмөр зарсан зураг нь Хар нуурын зургийг бүтнээр авах тэр оролдлого байжээ. Сандаалтай усанд зогсож байгаад элсэн манхан руу өгсөж 10-аад км явсан гэнэ. Дуранд нь бүхлээрээ багтахгүй явсаар явсаар хөлийнх нь эрхий хурууны өндөг цэврүүтэж хагарчээ. Тэр үүнийгээ ярьж, хамгийн их зорьж яван байж авсан зураг гэж танилцууллаа.

    1990-ээд онд хуучин аппаратаар авдаг байсан зургуудаас аваад хамгийн сүүлд өнгөрсөн жил авсан зураг ч багтжээ. Нийт зургийн сангаас тал хувь нь сайхан байгалийн өмнө Н.Алтанхуяг гарсан байв. Тайзны ард байрлуулсан элсэн манхантай адууны зургийг А.Тулга авсан хэмээгээд аав нь ихэд магтаж байлаа. Учир нь Н.Алтанхуяг зураг авахдаа зөвхөн сүүдэрлэн, шаргалтсан элсийг авч байсан бол А.Тулга адуутай хамт авсан байсныг гэртээ хариад дундын аппаратнаасаа харжээ. Эдгээр зургийн дийлэнхийг хоёр зурагчин “Sony” брэндийн мэргэжлийн аппаратаар авсан гэнэ. Тийм учраас зарим сайхан зургийг маш томоор угаалгаж гэртээ, ажлын байрандаа байрлуулсан хэмээн АН-ын дарга сайрхав. Түүний төрсөн нутаг Увс аймгийн Хархираа, Чандмань уулыг ажилдаа ч, гэртээ ч тавьсан гэдгээ хэлж байлаа.

    Үзэсгэлэн үргэлжилсээр Н.Алтанхуяг мэргэжлийн камер барьж хэд хэдэн поз авч зураг дарууллаа. Удалгүй өөрийн зээ охиныг тэвэрч гэрэл зурагчдын аппаратыг манасхийлгээд авсан. Энд хүрээд үзэсгэлэнгийн нээлтийн ажиллагаа өндөрлөх тийш хандсан бөгөөд Н.Алтанхуяг бэлэг болгож цөөн хэдэн зураг авчирчээ. Үзэсгэлэнд гаргасан зургуудтай хэмжээ, хүрээгээр ижил боловч гагцхүү тайлбарын оронд “Монголдоо сайхан аялцгаая” хэмээн бичсэн байна. Зургийг авах хүсэлтэй хүмүүс түүний гарын үсгийг зуруулаад, хамт зураг татуулж байсан юм. Зарим хүн зураг авч чадаагүйдээ жаахан урамгүй байсан бололтой танд файлаар байгаа биз дээ гэж сураглаад хоцорсон.

     Аав хүү хоёрын авьяас, мэдрэмжийг илэрхийлсэн “Монголдоо сайхан аялцгаая” үзэсгэлэн энэ сарын 24-нийг хүртэл үргэлжилнэ. Н.Алтанхуяг ингээд өөрийн гэсэн номтой бас хувийн үзэсгэлэнгийн цуглуулгатай болоод байна.